Напад поляків на берестейщину; походи татар I спустошення ними галицько-волинських земель

(1286—1287 рр.)

В прежереченая лета, коли Лестько взя Перевореск город Лвов, тоже Ляхове воеваша у Берестья по Кросне, и взяша сел десять и поидоша назад; Берестьяни же собрашася и гнаша по них, бяшеть бо Ляхов двесте, а Берестьян 70; бяшеть бо у них воевода Тит, везде еловый мужьством на ратех и на ловех: и тако угонивше е и бышася с ними, божиею же милостью победиша Берестьяне Ляхы и убишя их 80, а другия поимаша, а полон свой отполониша, и тако придоша во Берестий со честью, слявяще бога и пречистую его матерь во вся веки. Мы же на прежняя возвратимся... В лето 6791. Хотящу пойти оканьному и безаконьному Телебузе на Ляхы и собравшу ему силу многу, забывшу ему казни божие, еже сбыся над ним во Угрех, о нем же переде сказахом: и приде к Ногаеви, бяше же межи има нелюбовье велико. Телебуга же посла ко Заднепрейскымь княземь и ко Волыньскимь, ко Лвови и ко Мьстиславу и к Володимеру, веля им пойти с собою на войну; тогда же бяху вси князи в неволе Тотарьской. И тако поиде Телебуга на Ляхы, собрав силу многу. Пришедшу же ему к Горине, и срете и Мьстислав с питьем и з дары; и пойде оттоле мимо Кремянець ко Перемилю, ту и срете Во-лодимер князь с питьем и с дары на Липе; и посемь угони (и) Лев князь ко Бужьковичемь и с питьем и ь дары. И пришедшим же им на Бужьковьское поле, и ту перезреша свое полкы, князи же надеяхуться избитья собе и городом взятья; и оттоле поидоша к Володимерю и сташа на Житани. Телебуга же еха обвзирать города Володимеря; а друзии молъвять, оже бы и в городе был: но то не ведомо. В неделю же минуша город, по Микулине дни наутрии день, бог избави своею волею и не взяша города, но насилье велико творяху в городе и пограбиша товара бесчисленное множьство и коний. И тако безаконьны Телебуга пойде в Ляхы; осташа же Татарове друзин у Володимера кор-мити любивеи коне. Си же учиниша пусту землю Володимерьскую, не дадяхуть бо из города ни лезти в зажитье; аще ли кто выехашеть, овы избиша, а другия поимаша, а иныя лупяхуть и коне отъимахуть, и во городе изомре в остою, божиимь гневом, бесчисленное множество. Идущу же Телебузе в Ляхы, и с нимь идоша вси князи, неволею Татарьскою: Лев князь со сыном своим Юрьемь (с своею ратью), а Мьстислав со своею ратью, а Володимер со своею ратью. И тако поидоша ко Завихвосту и придоша ко реце ко Висле; река же стала бяшеть и не могоша ее перейти, и поидоша во верх ей к Судомиру, и переидоша Санпеку по леду; ту же на Сану Володимер воротися от них назад, Вислу переидоша по ледови выше Судомиря; и приступиша к городу со все стороне, но не успеша ничтоже, и почаша воевати землю Лядьскую и стояша на ней 10 дний. Телебуга же хотяше ити ко Кракову, и не дошед его воротися во Торжьку: весть бо приде к нему, оже Ногай попередил его ко Кракову, прити, и про се бысть межю има болшее нелюбье; и тако не снимавшася с Ногаемь и поиде назад на Лвову землю, на город на Лвов. И стояша на Лвове земле 2 недели, кормячесь, не воююче, и не дадяхуть ни из города вылести в зажитье; кто же выехашеть из города, овы избиваша, а друзии поимаша, а иныя излупивше пущагу нагы, а теи от мороза изомроша, зане бысть зима люта велми, и учиниша землю пусту всю. Се же наведе на ны бог грех ради наших, казня ны, а быхом ся покаяле злых своих безаконьных дел, и еще же и наконець исполни на нас гнев (свой): измре в городах во остою бесчисленное множьство, друзии же изомроша в селах вышедше из городов, по отшествии безаконьных Агарян. Но мы на предлежащее возвратимся. Ногай же оканьный не иде с Телебугою в Ляхы одиною дорогою, зане бысть межи има нелюбье велико, но иде свою дорогою на Перемышль. Пришедшу же ему к городу Кракову, и не успев у него ничтоже, якоже и Телебуга у Судимиря, но воеваше землю Лядьскую, а с Телебугою не снимася, зане боястася оба, сии сего, а сей сего; и тако поидоша назад в свое веже: Телебуга поиде своею дорогою опять, а Ногай своею дорогою. Тое же зимы и в Ляхох бысть мор велик; изомре их бесчисленное множество. По отшествии же Телебузине и Ногаеве, Лев князь сочте колко погибло во его земле людий: што поймано, избито, и што их божиею волею изъмерло,— полътретьинадесять тысяче.

Історія України в документах і матеріалах.—Т. 1.—С. 194—195.