Кыдзи да мый позьö вöчны изложение текст кывзiгöн

Медводз колö сюся кывзыны текст лыддьысьсö, (аудиогижöдсö), сюркнявны текст сюрöссö, гöгöрвоны авторыслысь мöвпъяссö.

Öтчыдысь текстсö кывзiгöн оз ков нинöм гижавны, мед эз ло пасъялöма ставсö пöдрад. Сэк вермас саявны-вошны медколанаыс.

Мыйсюрö позьö пасъявны текстсö мöдысь кывзiгöн: нимъяс, кадпасъяс, иннимъяс; веськыд сёрни и морта-морт сёрни, а сiдзжö медколана, подув кывъяс. Позьö пасйыны сьöрсьöн-бöрсьöн абзацъяссö, лоöмторъяслысь кадсö. Тайö отсалас лöсьöдны план.

Кыкнанысьсö кывзiгöн позьö вöчны пасйöдъяс – содтöдъяс: медводз пасъявны медтöдчана кывъяссö, кывтэчасъяссö, шуöмъяссö, кодъяс серти тырвыйö позьö лöсьöдны текст сюрöссö. Мöд пöв кывзiгöн содтавны, вежлавны кытi эз вöв гöгöрвоöма.

Коми кывйысь теста уджъяс вöчан нырвизьяс

Мöд юкöнас пыртöма теста заданиеяслысь кык блок. А1-А7 уджъяссö вöчигöн велöдчысьяс петкöдлöны текстъясысь сёрни артмöдан средствояс аддзыны да орфография правилöясöн вöдитчыны кужанлун. В1-В9 заданиеяс – синтаксис да пунктуация боксянь видлавны кужанлун.

А1-А7 заданиеяссö лöсьöдöма сы могысь, мед позис донъявны текст содержаниесö гöгöрвоöм, шöр мöвпсö дженьыда тöдчöдны кужöм, сёрни единицаяс, выразительнöй средствояс торйöдны кужöм, гижысьыслысь наöн вöдитчанногсö петкöдлыны кужöм.

А блокса уджъясас сетöм 4 варианта вочакывйысь колö бöрйыны öтиöс, правильнöйсö.

В1-В9 заданиеяс вöчигöн колö петкöдлыны синтаксисысь тöдöмлун: аддзыны тэчас сертиыс сёрникузя сюрöссö, тöдмавны грамматика подув лыдсö; аддзыны тэчас сертиыс сёрникузя сикассö, торйöдны кывтэчасъяс, сикасавны кывъяскостса йитöд сертиыс.

Медуна баллыс тайö уджъяссьыс 16. Уджъяссö вöчöм вылö сетсьö 85 минут; быд тест вöчöм вылö 3-5 минут.

Мый колö заданиеяссö колананогöн вöчöм вылö:

1. Сюся лыддьыны текстсö.

2. Заданиеяссö вöчны сьöрсьöн-бöрсьöн черновикö.

3. Бöрйöм вочакыв вариантсö босьтны кытшö (А1-А7 блокас). В1-В9 блокас кывйöн, кывтэчасöн вочавидзны, сёрникузяыслысь пасйыны номерсö.

А1-А7 заданиеяс вöчöмысь тöдчас текст видлавны кужöмыс.

А1 заданиеыс веськöдöма текстыслысь вежöртас тöдмалöм-гöгöрвоöм вылö, шöр мöвпсö восьтöм вылö.

А2 задание йитчöма кыв вежöртас гöгöрвоöмкöд, кыввор (лексика) боксянь гижöдсö видлалöмкöд. Колö индыны стöч сiйö вежöртассö, кутшöмын кывйыс петкöдчö текстас; веськыд да вуджöдöм вежöртасъяслысь стилистика рöмсö.

А3 заданиеын колö видлавны кыв мичмöдан средствояс: эпитетъяс, метафораяс, орччöдöмъяс, ловзьöдöмъяс, фразеологизмъяс.

А4 заданиеын текст видлавсьö фонетика боксянь: шыяс да шыпасъясöн найöс пасйöм, налöн лöсялöм; шыяслöн сёрниын петкöдчöм, гора-гортöм, чорыд-небыд согласнöйяс торйöдöм да пасйöм.

А5-А6 заданиеын колö петкöдлыны кывъяссö тэчас сертиыс видлавны кужöм; кыввуж, суффиксъяс торйöдны, сикасавны кужöм.

А7 заданиеын колö петкöдлыны гижанног правилöяс тöдöм, орфограммаа кывъяс торйöдны кужöм.

Лингвистика тема вылö мöвпалан гижöд донъялан критерийяс (муртöсъяс)

Велöдчысьяслы колö зэв бура тöдны, мый боксянь кутасны видлавны да донъявны ас гижöдсö прöверитысьяс, мый тöдчöдасны медводз.

С1К1	Эм-ö юалöм вылас подулалöм вочакыв	Баллъяс
	Велöдчысьыс кужöма гöгöрвоöдны юалöмсö теория боксяньыс. Восьтöма кывйын петкöдчанторсö тыр-бура. Торкöмъясыс абуöсь.	2
	Велöдчысьыс кужöма гöгöрвоöдны юалöмсö теория боксянь. Восьтöма кывйын петкöдчанторсö тыр-бура. Но кольöма 1 фактическöй öшибка, тезиссö абу тырвыйö гöгöрвоöм понда либö велöдчысьыс теория боксяньыс мöвпалöмсö вайöдöма, но подулалан видлöгъяс пыддиыс вайöдöма сöмын кывворын либö сöмын грамматикаын петкöдчанторъяс. Тезиссö гöгöрвоöдöмас торкöмыс (фактическöй öшибкаыс) абу.	1
	Велöдчысьыс теория боксяньыс мöвпъяссö вайöдöма-тöдчöдöма, но кольöма 2 и унджык öшибка, тезиссö абу бура гöгöрвоöма да либö тезиссö абу эскöдöмöн восьтöма либö кежöма заданиесьыс либö тезиссö восьтöма-эскöдöма йöзкост сёрни стильöн	0
С1К2	Эмöсь-ö эскöдана-подулалан видлöгъяс
	Велöдчысь вайöдöма 2-3 видлöг сетöм текстсьыс, кодъяс петкöдлöны кыввор и грамматика явлениеяссö, налысь текстын коланлунсö	3
	Велöдчысь вайöдöма 2-3 видлöг сетöм текстсьыс, кодъяс петкöдлöны кыввор и грамматика явлениеяссö, налысь текстын коланлунсö но абу тöдчöдöма текстын налысь коланлунсö либö вайöдöма 1 видлöг кывворын и грамматикаын петкöдчантор тöдчöдöм вылö, текстын налысь коланлунсö индöмöн	2
	Велöдчысь вайöдöма текстсьыс сöмын öти эскöдан видлöг, тöдчöдöма кывворын и грамматикаын сöмын öти петкöдчанторйöн, текстын коланлунсö абу индöма	1
	Велöдчысь абу вайöдöма ни öти видлöг тезиссö восьтöм могысь либö видлöгъяссö вайöдöма, но абу сетöм текстсьыс	0
С1К3	Петкöдчö-ö ас гижöдыслöн вежöртас боксяньыс öтторъялуныс (целостность), мöвпъяссö сьöрсьöн-бöрсьöн пукталöмыс
	Велöдчысьлöн уджын петкöдчö мöвпъяслöн вежöртас боксянь öтторъялуныс, мöвпъяссö сьöрсьöн-бöрсьöн тэчöмыс: - логика боксянь торкöмъяс абуöсь - мöвпъяссö тöдчöдöма сьöрсьöн-бöрсьöн, торкавтöг - тыр-бура торйöдöма абзацъяссö	2
	Велöдчысьлöн уджын петкöдчö мöвпъяслöн вежöртас боксянь öтторъялуныс, мöвпъяссö сьöрсьöн-бöрсьöн тэчöмыс но кольöма гижöд логикаас 1 торкöм либö абзацъяс вылас абу колананог юклöма	1
	Мöвпалан ас гижöдас тöдчö велöдчысьлöн мöвпъяснас юксьыны кöсйöмыс, мöвпалан сямыс но кольöма 1 логикаа торкöм либö 2 öшибка абзацъяс торйöдöмас	0
С1К4	Ас гижöдлöн тэчас
	Гижöдыслöн тэчасыс лöсьыд, юкöнъяссö бура йитлöма, мöвпалан панассö, шöр юкöнсö, помсö тöдчöдöма, гижöд тэчасас торкöмъяс абуöсь	2
	Уджсö тэчöма и эштöдöма но кольöма 1 öшибка гижöд тэчасын	1
	Гижöд тэчасын петкöдчö 2 и унджык торкöм	0

С1К1-С1К4 критерий серти мöвпалан ас гижöдысь медся унаыс вермö лоны 9 балл.