818*. Тошкалтыш мучаш мӧрӧ кӱмешке,

Молан тудым вучен огытыл?

Пакча покшел эҥыж кӱмешке,

Молан вареньым шолтен улыт?

Идым покшел олма шуыде,

Молан тудым кӱрын улыт?

Мемнан рвезын жапше шуыде,

Молан нуным пуштеден улыт?

«Молан пуштедат?» - маныда гын,

Кугыжан поянлыкшым аралаш.

Пашазе калык деч лӱдмышт дене

Кресаньык игым пытарат.

Пока у крыльца не созрела клубника,

Зачем не подождали?

Пока посреди огорода не поспела малина,

Зачем сварили из неё варенье?

Пока посреди гумна не созрели яблоки,

Зачем их сорвали?

Пока не пришло время наших парней,

Зачем их убили?

«Для чего убивают?» - вы спросите,

Чтобы охранять богатство царя.

Страшась трудового народа,

Уничтожают крестьянских детей.

819*. Пӧрт покшекет легылдал ончальымат -

Уремын-уремын койылдале.

Покшел окнашке ончальымат -

Латкок тумерет койылдале.

Латкок тумер йымачынет ончальымат -

Латкок кугыжат тарванале.

Латкок кугыжа тарваналмеҥге,

Мемналан кнага толдале.

Мемналан кнага толын толмеҥге,

Мемнан изаже упшым налден шогале.

Мемнан изан упш налын шогалмеҥге,

Мемнан еҥгаже ший аршашым рӱзалтыш.

Мемнан еҥган ший аршаш рӱзалтымеҥге,

Мемнан корныжо порсын ярым гай ярымалте.

Мемнан лектын кайыме годым

Ача ден аваже шортын возалтын кодыч.

Межат каялын колтышна,

Сай кодса, сай кодса!

Встав посреди избы, я посмотрел,

Улица показалась;

Посмотрел я в среднее окно -

Показалось двенадцать дубняков.

Из-под двенадцати дубняков я посмотрел,

Двенадцать царей собираются.

Как только двенадцать царей собралось,

Нам бумага пришла.

Как пришла к нам бумага,

Наш брат встал, ухватив шапку.

Как только брат встал, взяв шапку,

Наша сноха встряхнула серебряными бусами.

Как только сноха встряхнула серебряными бусами,

Наша дорога, словно шёлковая прядь, разветвилась.

Когда мы стали уходить,

Наши родители с плачем остались.

Мы отправились в дорогу,

Счастливо вам оставаться!

820. Ой, родыжат-шамычшат,

Тулар-тулачыжат-шамычшат,

Чевер еҥгай-шамыч,

Пеледыш гай ӱдыр-шамыч,

Ончеда аман шинчашкем,

Кӱсеныш чыкен наҥгаяш огеш лий тендам.

Ах, родственники мои,

Сват-сваха мои,

Красавицы-невестки мои,

Девушки, подобные цветам,

Смотрите, видно, мне в глаза,

Положив в карман, нельзя унести вас.

821. Эй, шкенан ешна-шамыч,

Шыпак шогаш толын огына ул.

Муралтыза, кутыралтыза,

Кушталтыза, ковырадам ончыктыза.

Шинчан еҥже ончен шинча.

Капна олмеш пинчакна кодеш,

Вуйна олмеш упшна кодеш,

Йолна олмеш кемна кодеш,

Кидна олмеш перчаткына кодеш.

Калыклан ойлаш койышна кодеш.

Мемнан койышым чевер аралыза,

Каласен илыза.

Тиде марий мо тӱрлын кушкын,

Мо тӱрлӧ койышан манын, каласен шогыза.

Эй, сбои семейные,

Мы не приехали, чтоб тихо стоять.

Пойте, общайтесь,

Пляшите, покажите своё щегольство.

Люди с глазами сидят и смотрят.

Вместо тела нашего пиджак остаётся,

Вместо головы нашей шапка остаётся,

Вместо ног наших сапоги остаются,

Вместо рук перчатки остаются.

Людям обсуждать поступки наши останутся.

Наши обычаи хорошо сохраняйте,

Вспоминая нас, живите.

Что этот мариец по-разному рос,

Что был разного поведения, говорите.

822. Кынела кушкын улына,

Пачашла ойыралтына.

Посто гане пошкудына кодеш.

Мемнан кайышаш корныжо

Ярымалтын кия.

Мыланна шарыме тӧшакше

Озаҥ олаште кия.

Словно конопля, мы выросли,

Словно посконь, отделились.

Словно сукно, соседи наши остаются.

Дорога, по которой нам уходить,

Стелется, разветвляясь.

Постеленная для нас перина

Лежит в городе Казани.

823. Чодыра покшел тумыжым

Нылыте шелаш пеш йӧсӧ,

Пасу покшел пистыжым

Кумыте шелаш пеш йӧсӧ,

Вӱта шеҥгел куэжым

Кокыте шелаш пеш йӧсӧ,

Шочмо-кушмо мландыжым

Кудалтен каяш пеш йӧсӧ.

Дуб посреди леса

Очень трудно разрубить на четыре части,

Липу посреди поля

Очень трудно расколоть на три части.

Берёзу за хлевом

Очень трудно расколоть пополам.

Родную землю

Очень трудно оставить.

824. Идымвечет - куэрет,

Куку мурен чеверын.

Пакчавечет - ломберет,

Шӱшпык шӱшкен чеверын.

Ой, ачием-авием,

Кидым кучен, чеверын.

Ой, йолташем-чеверем,

Ваш ончалын, чеверын.

Твоё гумно - березняк,

С пением кукушки прощайте.

Твоё овощное поле - черёмушник,

С соловьиным свистом прощайте.

Ах, родители мои,

Взявшись за руки, прощайте.

Ах, друзья мои,

Посмотрев друг на друга, прощайте.

825. Чодыра покшел шыгырже

Мемнан руэн налде ок йоҥгыдем.

Олык покшел шыгырже

Мемнан солен налде ок йоҥгыдем.

Агул покшел шыгырже

Мемнан каен пытыде ок йоҥгыдем.

Чинче шулдыр таҥна кодеш,

Чинче шулдыр авана кодеш.

Глушь посреди леса,

Если мы не вырубим, не станет просторней.

Гуща посреди луга,

Если мы не скосим, не поредеет.

Теснота среди деревни,

Если мы не разойдёмся, не станет свободнее.

С блестящими крыльями подруги наши остаются,

С блестящими крыльями мать наша остаётся.

826*. Тӱрволак гыч вӱдшӧ йога,

Ший печкежым кӧ шында?

Мемнан шинча гыч вӱд йога,

Ош шовычым кӧ пуа?

Йогынвӱдшӧ талын йога,

Йоген кая, серже кодеш.

Мемнам ончен ужатеда да,

Меже каена, теже кодыда.

С жёлоба течёт вода,

Кто поставит серебряную бочку?

Из наших глаз течёт вода,

Белый платок кто подаст?

Проточная вода бурно течёт,

Протечёт - берега останутся.

Ухаживая, проводите нас,

Мы-то уйдём, но вы останетесь.

827. Пасу покшел тумыжым

Нылыте шелаш пеш йӧсӧ.

Шочмо-кушмо мландыжым

Кудалтен каяш пеш йӧсӧ.

Идым шеҥгел куэшкем

Ойган куку толын мура.

Ойган кукун мурымыжым

Ойган еҥ колышт шортеш.

Чеверын, куэрем, чеверын, ломберем,

Чеверын, йӧратыме садерем.

Чеверын, аваем, чеверын, ачаем,

Чеверын, йӧратыме йолташем.

Ош пӧртдажын ош коҥгажым

Ошемдалын-ошемдалын илалза.

Мыйын каен колтымекем,

Шарналтен-шарналтен илалза.

Изарня кече лиймешкыже,

Кугарня кече лийже ыле.

Кайыме корно лиймешкыже

Толмо корно лийже ыле.

Идым шеҥгел сӧремже

Возын канаш веле йӧрыш.

Шочмо-кушмо суртемже

Шочын-кушкаш веле йӧрыш.

Дуб посреди поля

Очень трудно разделить на четыре части.

Землю, где родился и вырос,

Очень трудно, оставив, уйти.

На берёзу за гумном

Грустная кукушка, прилетая, поёт.

Пение грустной кукушки

Печальный человек, слушая, плачет.

Прощай, мой березняк, прощай, мой черёмушник,

Прощай, мой любимый сад.

Прощай, моя матушка, прощай, мой батюшка,

Прощай, моя любимая подруга.

Белую печку в вашем белом доме

Белите и живите.

После моего ухода,

Вспоминая обо мне, живите.

Вместо четверга

Была бы пятница.

Вместо дороги, по которой уезжать,

Была бы обратная дорога.

Целина позади гумна

Сгодилась, чтобы только лечь и отдохнуть.

Родной мой дом

Сгодился, чтобы только родиться и вырасти.