Qaraqalpaq ádebiyatın sabaqtan tıs jumıslar arqalı úyreniwdiń ilimiy metodikalıq máseleleri

J.Izbasqanov, O.Sátbaev, X.Dáwletnazarov, B.Ernazarov, N.Tóreshova,

S.Ismayılov, J.Óteniyzov, A.Ábdiev hám taǵı basqalardıń dóretiwshiliginen tematikalıq joba dúzilgeni durıs. Dógerek basshısı ádebiy shıǵarmalardı tallaw hám onı túsindiriw arqalı oqıwshılarǵa teoriyalıq bilim beriwden tısqarı, dóretiwshilik jumısınan da xabardar bolıwı kerek. Dógerek aǵzaları tárepinen dóretilgen qosıq yaki gúrrińdi oqıwshılarǵa oqıp berse boladı. Berilgen ádebiy shıǵarmalardı kórkem oqıw, onı mánili sóylep beriw dógerek basshısı hám aǵzalarınıń tiykarǵı wazıypası. Óytkeni, oqıwshılardı qosıq, gúrrińlerdi kórkem oqıwǵa qızıqtıra alıwımız kerek. Sonday-aq, dógerek aǵzaları arasında qosıq hám gúrrińlerdi jaza alatuǵın, respublikalıq baspa sózde, gazeta hám jurnallarǵa kórkem dóretpeleri menen qatnasatuǵın talantlı oqıwshılar da ushırasadı. Bunday talant iyelerin dógerek jumısına belsendi qatnastırıp, olardıń dóretpelerin talqılap hám talapqa juwap beretuǵınların baspaǵa usınıw kerek.

Dógerek jumısların bir ayda bir yaki eki ret ótkeriw shárt. Bul waqıt aralıǵında dógerek aǵzaları temalarǵa jaqsı tayarlanıp keledi. Dógerek jumısların kúndelik sabaqlar ótkeriletuǵın toparda emes, liceydegi ádebiyat bólmelerinde, oqıwshılardı qızıqtıratuǵın dárejede bezelgen, jaqsı hám taza bólmelerde ótkergen maqul. Óytkeni, ádebiyat bólmesindegi shayır-jazıwshılardıń súwretleri, diywalǵa qıstırılǵan danalıq sózleri, kórkem shıǵarma mazmunı tiykarında salınǵan súwretler oqıwshılarǵa biraz zawıq baǵıshlaydı. Dógerek aǵzaların qızıqtıratuǵın, olardıń háreketsheńligin asıratuǵın máselelerdiń biri - jumıs jobasınıń tematikası mazmunlı hám tásirli bolıwı kerek. Jumıstıń mazmunı tańlanǵan temalardıń tárbiyalıq áhmiyetine hám kórkemligine baylanıslı boladı. Jumıstıń tematikalıq jobası licey oqıwshılarına arnalıp dúzilgen epikalıq hám lirikalıq dógerek jumısınıń jobasına tiykarlanıp dúziledi. Qaysı dógerek jumısınıń tematikası bolmasın, bári de bir jılǵa mólsherlep dúziledi. Solay etip, usı jobada dógerek aǵzalarınıń maqsetleri hám pikirleri esapqa alınǵanı maqul. Bir jılǵa dúzilgen dógerek jumısınıń jobası temalarǵa bólinip jazıladı.

Akademiyalıq liceylerde ádebiyat boyınsha kóbinese ádebiy dóretiwshilik dógerek jumısları ótkeriledi. Bul jumıs túri licey turmısında ádewir sınalǵan. Usı

12

másele boyınsha ótkeriletuǵın jumıstıń maqseti eki túrli xarakterge iye. Jumıstıń bul túri toparda alǵan oqıwshılardıń bilimin bekkemlew hám tolıqtırıwǵa, ádebiy shıǵarmalar yamasa ayırım jazıwshılardıń dóretiwshilik jolı menen hár tárepleme tolıq tanısıwǵa qaratılǵan boladı. Sonlıqtan, bul dógerekke joqarı topar oqıwshıları tartıladı.

Akademiyalıq liceylerde dóretiwshilik dógerek jumısın ádewir jetilistiriw kerek. Óytkeni oqıwshılar akademiyalıq liceyde óz betinshe pikirlew qábiletin rawajlandırıp baradı. Dógerek jumıslarında ádebiyat boyınsha úyrengen bilim kónlikpelerin oqıwshılar ámelge asırıp, kórkem estetikalıq mashqalalardı súwretlewde ádebiy túr hám janrlardıń ózine tán ózgesheliklerin ajıratıw, kórkem shıǵarmadaǵı qaharmanlarǵa pikir bildiriwde shıǵarma mazmunına tiykarlanıw, sózdiń tuwra hám awıspalı mánilerin kórkem shıǵarmada qalay qollanılǵanlıǵın ańlaw, tekstti kórkem hám obrazlı oqıw, insanıylıq jaqsı qásiyetlerdi sińdire alıw sıyaqlı bilim-kónlikpe, uqıplılıqlardı qáliplestirip barıw hár bir oqıtıwshı ushın juwapkershilikli wazıypa bolıp tabıladı.

Belgili metodistler Q.Yuldoshev, Á.Paxratdinovlar óz miynetlerinde bul dógerek jumısı tuwralı bahalı pikirlerin bildirgen. Professor Á.Paxratdinov “Qaraqalpaq ádebiyatın oqıtıw metodikası” qollanbasında: “Ádebiy tvorchestvolıq krujok: Mekteptegi bul krujok oqıwshılar ushın eń awır, eń qıyın jáne de eń qızıqlı krujoklardıń biri bolıp esaplanadı. Sonıń ushın mekteptegi bul krujok aǵzalarınıń topardaǵı eń saylandı oqıwshıları tartılıwı kerek boladı. Usı ádebiy tvorchestvolıq krujoktıń óz aldına qoyatuǵın tiykarınan eki wazıypası boladı. Birinshi wazıypa: Krujok aǵzaları qaraqalpaq ádebiyatın mektepte tereń úyreniw. Ekinshi wazıypa: Bul krujoktıń aǵzaları mektepte ózlerinshe ádebiy tvorchestvolıq isti rawajlandırıwǵa aktiv iniciatorlardıń biri bolıwdan ibarat”14,– dep kórsetedi. Sonlıqtan dóretiwshilik dógerek jumısınıń temaların pán muǵallimi oqıwshılardıń bilim kónlikpelerin esapqa alǵan halda tereń mazmunlı hám qızıqlı temalar átirapında qurıwı zárúr. Tómendegi temalardı alǵanı maqsetke muwapıq:

14 Пахратдинов Ә. Қарақалпақ әдебиятын оқытыў методикасы. Нөкис “Билим”, 1992, 278-бет.

13

1.Axmed Yugnakiydiń “Haqıyqatlar sıylıǵı” dóretpesinde turmıs shınlıǵınıń súwretleniwi.

2.Yusup Has Hajıbtıń “Baxıtqa baslawshı bilim” shıǵarmasında bilimniń táriypleniwi.

3.Noǵay zamanınıń jıraw-shayırları.

4.Jiyen Amanlıq ulınıń “Posqan el” shıǵarmasında tariyxıy shınlıqtıń jırlanıwı.

5.Kúnxojanıń lirikası hám onıń tematikası

6.Ájiniyaz shayırdıń “Bozataw” poemasınıń ideyalıq mazmunı.

7.Saadiydiń “Gúlistan” shıǵarmasınıń syujeti.

8.“Qırıq qız” dástanında xalıqlar doslıǵınıń jırlanıwı.

9.K.Sultanovtıń “Ájiniyaz” romanınıń mazmunı.

10.Berdaqtıń lirikalıq qosıqlarında ádep-ikramlılıqtıń súwretleniwi.

11.“Amangeldi” dástanınıń ideyalıq mazmunı.

12.S. Májitovtıń “Baǵdagúl” dramasınıń syujeti.

13.N.Dáwqaraevtıń “Alpamıs” draması.

14.S.Nurımbetovtıń “Xanalas” dástanınıń syujeti.

15.G.Esemuratovanıń prozalıq shıǵarmalarında awıl teması.

16.I.Yusupovtıń “Watan topıraǵı” poemasınıń ideyalıq mazmunı.

17.A.Bekimbetovtıń prozası hám ondaǵı qaharmanlarǵa sıpatlama.

18.S.Xojaniyazovtıń “Súymegenge súykenbe” dramasınıń syujeti.

Dóretiwshilik dógerek jumısınıń tematikası usı baǵdarda dúzilip, oqıwshılar yaǵnıy dógerek aǵzaları usı temalar boyınsha byanat jasaydı. Temalar boyınsha basqa dógerek aǵzaları shıǵıp sóyleydi. Nátiyjede oqıwshılarda dógerek jumısına bolǵan qızıǵıwshılıq ádewir jetilisip baradı.

Qaraqalpaq ádebiyatı baǵdarlaması tiykarında dramalıq dógerek jumısın shólkemlestiriw kerek. Bul dógerek jumısı oqıwshılardıń ádebiyatqa, dramalıq shıǵarmalarǵa bolǵan qızıǵıwshılıǵın arttıradı. Dramalıq dógerek jumısınıń ózine tán ózgeshelikleri bar. Bul máseleler dógerek jumısına qoyılatuǵın talaplardan kelip shıǵadı. Dramalıq dógereginiń aǵzaları ádebiyat teoriyası, shıǵarmalardı

14

tallaw usılları, janrlar hám olardıń ózgeshelikleri, dramalıq shıǵarmalardıń payda bolıw sebepleri menen tanısıp baradı. Oqıwshılardıń qızıǵıwshılıqları esapqa alınıp dógerekke aǵza etip qabıl etiledi. Sonlıqtan dógerek aǵzaları dramalıq shıǵarmalardıń mazmunı, syujeti, qaharmanlarınan xabardar bolıwı kerek. Dógerek aǵzalarına dramalıq janr boyınsha teoriyalıq maǵlıwmat beriw, anıq ózgeshelikleri menen tanıstırıw ádebiyat muǵalliminiń baslı wazıypası esaplanadı.

Ádebiy dóretiwshilik jumısları sıyaqlı dramalıq dógerek jumısında sabaqtan tıs oqılatuǵın materiallar tiykarında jumıs ótkeriw zárúr. Jumıstıń eń áhmiyetli bólekleriniń biri dramalıq dóretpeni saxnalastırıp qoyıwdan ibarat. Usı waqıtları dógerek aǵzaları dramanıń mazmunı hám tekstleri menen tanısadı. Dógerekte saxnalıq kóriniske tayarlıq barısında dógerek aǵzaları obraz jarata alıwı kerek.

Dógerek jumısınıń tematikasına S.Májitovtıń «Baǵdagúl», Á.Ótepovtıń «Teńin tapqan qız», Q.Áwezovtıń «Tilek jolında», J.Aymurzaevtıń «Qádirdan doktor», Á.Shamuratovtıń «Qırıq qız», J.Aymurzaevtıń «Berdaq» pesalarınan tısqarı ǵárezsizlik dáwirdegi saxnalıq shıǵarmalardan paydalansaq maqsetke muwapıq boladı. Sonday-aq tek belgili jazıwshılardıń dóretpelerinen paydalanıp qoymastan, talantlı qálemkeshlerdiń saxnalıq shıǵarmalarınan paydalanıwǵa boladı. Hár qanday tańlap alınǵan saxnalıq dóretpeniń tárbiyalıq áhmiyetine dıqqat awdarıw kerek. Dógerek aǵzaları teoriyalıq bilimin arttırıw maqsetinde kino hám teatrlarda kórgen dóretpeleri haqqında, artistlerdiń saxnada qalay oynaǵanı tuwralı pikir alısıp barǵanı maqul. Nátiyjede pikirlew qábileti rawajlanadı, saxnalıq shıǵarmalarǵa túsinigi artadı, dógerek jumısına qızıǵıwshılıǵı kúsheyip baradı.

Kórkem oqıw hám kórkem bayanlap beriw dógeregi boyınsha da bazı bir metodikalıq pikirlerdi bildirgenimiz durıs. Sabaqtan tıs jumıslardıń ishinde kórkem oqıw dógerek jumısı licey turmısında áhmiyetli orındı iyeleydi. Bul dógerek jumısı baǵdarlama materialları tiykarında shólkemlestirilgeni maqsetke muwapıq. Dógerek aǵzalarına hár bir topardan 4-5 oqıwshı saylap alǵanımız maqul. Jumıstıń jobası pán muǵallimi tárepinen sheber dúzilgen jaǵdayda ǵana dógerek aǵzaları arasında qızıǵıwshılıq artadı. Bul dógerekte oqıwshılardı jáne de qızıqtıratuǵın nárseler radio hám magnitofonlar. Oqıw texnikası menen tanıstırıw ushın radiodan

15

kórkem oqıw yaki bolmasa tásirli oqıǵan sózlerin magnitofon plyonkasına jazıp tıńlaw áhmiyetli usıllardan esaplanadı. Dógerek aǵzaları belgili tájiriybege iye bolǵannan keyin liceyde ótkeriletuǵın A.Dabılov, I.Yusupov, T.Qayıpbergenov, K.Raxmanov, Sh.Seytov h.t.basqalardıń ádebiy dóretiwshiligine arnalǵan ádebiy keshelerde yadlaǵan tekstlerin oqıp beriwi kerek. Sonday-aq, dógerek aǵzaları qalalıq hám respublikalıq kóleminde jazıwshılardıń dóretiwshiligine baylanıslı ádebiy keshelerge turaqlı túrde qatnasıp barıwı tiyis. Nátiyjede oqıwshılardıń pikirlew qábileti, sóylew mádeniyatı qáliplesip baradı.

Akademiyalıq liceylerde ádebiy konferenciya hám ádebiy keshe ótkeriw eń áhmiyetli metodikalıq máselelerden esaplanadı. Kópshilik metodistler ádebiy konferenciya menen ádebiy kesheni birdey sabaqtan tıs jumıstıń túrleri dep qaraydı. Negizinde ilimiy metodikalıq izertlew jumıslarında ádebiy konferenciya menen ádebiy keshelerdiń bir-birinen ózgesheligin túsindiredi.

Belgili metodistler A.S.Zunnunov15, K.Juraev16, Q.Yuldashev17, S.Ismatov18 hám taǵı basqalardıń miynetlerinde bul másele boyınsha metodikalıq pikirler az aytılǵan. Á.Paxratdinovtıń “Qaraqalpaq ádebiyatın oqıtıw metodikası” miynetinde konferenciyanı jazıwshılardıń kórkem dóretpelerine arnalıp ótkeriliw kerekligi aytıladı. Bul pikirdi basqa da alımlar qollap quwatlaydı. Bizińshe, konferenciya eki baǵdarda ótkerilgeni durıs boladı. Birinshiden, jazıwshı-shayırlardıń ómiri hám dóretiwshiligine arnalsa, ekinshiden, jazıwshılardıń kórkem dóretpelerine tiykarlanıp ilimiy baǵdarda ótkergenimiz maqsetke muwapıq. Konferenciya

ótkeriw jobaların qaraqalpaq ádebiyatı muǵallimi islep shıǵadı.

I.Yusupov dóretpeleri boyınsha konferenciyanı mına baǵdarda jobalastıramız. Shayırdıń dóretpelerine sholıw túrinde ádebiyatshı muǵallimniń kiris sózi boladı.

1.Kiris sóz.

2.I.Yusupovtıń watanǵa baylanıslı lirikası.

15Зуннунов А.С., Хотамов Н., Эсонов Ж., Иброҳимов А. «Адабиëт ўқитиш методикаси». Т., «Ўқитувчи»,

1992.

16Жўраев К. Мактабда Ойбекнинг ҳаëти ва ижодини ўрганиш. Тошкент «Ўқитувчи», 1973.

17Йўлдошев Қ., Мадаев О., Абдураҳмонов. «Адабиëт ўқитиш методикаси». Т., «Ўқитувчи», 1999.

18Исматов С. Мактабда Абдулла Қаҳҳорнинг ҳаëти ва ижодини ўрганиш. Тошкент «Ўқитувчи», 1979.

16

3.“Joldas muǵallim” poeması haqqında.

4.Shayırdıń “Qara tal”, “Seksewil”, “Kewil kewilden suw isher” qosıqların kórkem oqıw.

5.“Poseydonnıń ǵázebi” poemasınıń mazmunı.

6.“Dala ármanları” poemaların tallaw.

7.“Tumaris” poemasınıń ideyalıq mazmunı.

8.“Aktrisanıń ıǵbalı” poemasınıń mazmunı.

9.“Búlbil uyası” poemasınıń mazmunı.

10.“Qaraqalpaq haqqında sóz” poemasında obrazlarǵa sıpatlama beriń. Ádebiy konferenciyanı licey oqıwshıları menen birlikte ótkeriwge boladı.

Sebebi oqıwshılar ádebiyat baǵdarlaması boyınsha A.Dabılov, T.Jumamuratov,

T.Qayıpbergenov, S.Xojaniyazov, I.Yusupov dóretiwshiliklerin úyrenedi. Sabaqtan tıs jumıslardıń qaysı túri bolmasın, ol oqıwshılardıń túsinigin

arttırıwǵa, xalıqtıń turmısın, mádeniyatın, kórkem ónerin úyretiwdi tiykarǵı maqset etip qoyadı. Joqarıdaǵı jazıwshı-shayırlardıń birewine baylanıslı kitap oqıwshılar konferenciyasın úsh túrde ótkeriw múmkin.

Akademiyalıq liceylerde kóbirek ótkerilip júrgen ádebiy konferenciya jazıwshı-shayırlardıń bir shıǵarması, dóretiwshilik jolı yamasa jazıwshı-shayır jasaǵan dáwiri tiykarında ótkeriledi. Bul konferenciya oqıwshılardıń kórkem shıǵarma boyınsha sabaq barısında alǵan bilimlerin tereńlestiriwge, sóz sheberiniń ómiri hám dóretiwshilik jolı menen keńnen tanısıw, ideyalıq hám kórkemlik jaqtan belgili bir áhmiyetli orın tutatuǵın shıǵarmalarǵa qızıǵıwshılıǵın arttırıw, olardıń ádep-ikramlılıq, gózzallıq sezimlerin rawajlandırıwdan ibarat. Konferenciyalar oqıwshılardıń belgili bir tema ústinde islewine, ózleri unatıp júrgen kórkem shıǵarma hám kórkem obrazlar haqqında erkin gúrrińlesiwge tolıq jaǵday jasaydı.

Máselen, J.Aymurzaevtıń ómiri hám dóretiwshiligi boyınsha konferenciyanı ótkeriw úlgisine dıqqat awdarayıq.

Tema: J.Aymurzaev-kórkem sóz ustası.

Maqseti: J.Aymurzaevtıń “Hákisliler” (1954), “Qosıqlar” (1933), “Qosıqlar”

(1956), “Ullı watan qosıǵı” (1959), “Tasqın” (1946), “Meniń batırlarım” (1949),

17

“Qaharmanlıq gúreske” (1942), “Shayır sózi”, “Jańa áwladlarǵa” (1951), “Dańqlı doslar” (1954), “Aydın jol” (1955), “Ámiwdárya boyında” (1967), “Qızketken” (1972), “Ómir shaydasıman” (1986), “Jetpis toǵızınshı báhár” (1989), J.Aymurzaev. Shıǵarmalarınıń I tomı (1961), II tom (1962), J.Aymurzaev.

Shıǵarmalarınıń eki tomlıǵı (1989), “Ulım tıńla”, Qosıqlar hám poemalar (1996), “Jetimniń júregi” (1993) sıyaqlı toplamlarına arnalǵan kitap oqıwshılar konferenciyasın keń túrde ótkeriw arqalı jazıwshı shıǵarmaların jánede tereńirek úyretip, olardıń tárbiyalıq táreplerin túsindiremiz. Konferenciya ótilmesten aldın ádebiyatshı muǵallim dógerek aǵzaları menen keńesip aladı. Olarǵa konferenciyanıń teması, ótkeriletuǵın waqtı aytıladı, onda islenetuǵın jumıslar oqıwshılarǵa bólistirilip beriledi.

Bunday konferenciya S.Xojaniyazovtıń ómiri hám shıǵarmalarına arnalıp ótkeriliwi múmkin. Oqıwshılarǵa S.Xojaniyazovtıń shıǵarmaların oqıw, “S.Xojaniyazov - belgili dramaturg”, “S.Xojaniyazovtıń “Súymegenge súykenbe” dramasınıń mazmunı”, «“Súymegenge súykenbe” dramasınıń syujeti», «“Súymegenge súykenbe” dramasınıń baslı obrazlarına sıpatlama beriń» h.t.b. temalarda bayanat jumısları tapsırıladı. Jazıwshınıń ayırım shıǵarmalarınan úzindiler yadlaw, kórkem oqıwǵa hám dramalıq shıǵarmaların saxnalastırıw jumıslarına tayarlıq kóriliwi shárt. Sonıń menen birge usı jumısta “Súymegenge súykenbe” draması boyınsha pikir alısıwlar muǵallim tárepinen tekserilip, olar dógerekte kórip shıǵılıp, eń saylandıların tańlap alıp, diywalı gazetada járiyalanadı. S.Xojaniyazovtıń dramalıq shıǵarmalarına arnalıp, tómendegi sorawlar

plakatlarǵa jazılıp qoyılıwı da múmkin. Máselen:

1.S.Xojaniyazovtıń “Arıwlar”19 dramasınıń ideyalıq mazmunı.

2.“Erkebaydıń epkini” dramasınıń syujeti hám kompoziciyası.

3.“Mamanbiy” dramasınıń mazmunı.

4.“Jaslar” dramasınıń ideyalıq mazmunı.

5.“Bunı da kóreyik” dramasınıń janrlıq ózgeshelikleri.

6.“Júrek nusqawı” dramasınıń syujeti.

19 Хожаниязов С. Арыўлар. Нөкис “Қарақалпақстан”, 1987.

18

7.“Baxıt jolı” shıǵarmasınıń baslı qaharmanlarına sıpatlama.

8.“Biziń bahadır” dóretpesiniń syujeti.

9.“Tóreniń tutqan jeńgesi” dramasınıń kórkemliligi.

10.“Súymegenge súykenbe” dramasınıń mazmunı.

11.“Súymegenge súykenbe” dramasınıń baslı qaharmanlarına sıpatlama.

12.Dóretpede qaysı dáwirdegi waqıyalar súwretlenedi?

13.Dramalıq shıǵarmadaǵı obraz jasaw máseleleri.

Konferenciya jobasın tómendegishe dúziwge boladı:

1.Kiris sóz.

2.Byanat: S.Xojaniyazovtıń dramalıq shıǵarmalarında jaslar teması.

3.Byanat: S.Xojaniyazov qaraqalpaq dramaturgiyasın rawajlandırıwǵa salmaqlı úles qosqan talant iyesi.

4.Byanat: S.Xojaniyazovtıń “Súymegenge súykenbe” dramasınıń syujeti.

5.“Súymegenge súykenbe” draması tiykarında saxnalıq kórinis.

6.Kórkem oqıw: Aysánem, Parshagúl, Áwez, Ǵodalaq sózleri, monologları.

7.Oqıwshılardıń shıǵıp sóylewleri.

8.Dramaturgtiń ádebiyattaǵı ornı.

9.Juwmaqlaw.

Usı joba boyınsha konferenciyanı ótkeriw ushın barlıq nárse kúnnen burın tayarlanadı. Baǵdarlamada kórsetilip ótilgendey-aq islenetuǵın jumıslar anıq belgilenedi. Konferenciya bolatuǵın bólmege kórgizbe múyesh shólkemlestiriliwi kerek. Kórgizbeniń birinshi bólimi S.Xojaniyazovtıń shıǵarmaları, dramaturgtiń ómirine, dóretpelerine tiyisli bolǵan súwretler, dramaturg haqqında aytılǵan pikirler bolıwı tiyis. Al, kórgizbeniń ekinshi bólimin oqıwshılardıń dóretiwshilik isleri menen bezeliwi shárt. Máselen, licey oqıwshılarınıń S.Xojaniyazovtıń shıǵarmaları tiykarında jazılǵan jazba jumısları, pikirleri, kúndelikleri, albom, qosıq, súwretleri orın aladı. S.Xojaniyazovtıń ómiri hám dóretpeleri boyınsha ádebiyat muǵallimi menen kitapxanashı tárepinen ótkeriletuǵın konferenciyalar da oqıwshılardıń bilim dárejesin jetilistiriwde úlken áhmiyetke iye. Bul konferenciyanı ótkeriwdegi maqset sabaqtan tıs oqıw ushın usınılǵan dramalıq

19

shıǵarmalardı hár tárepleme túsinip alıwǵa arnaladı. Ádebiy konferenciya tómendegi usılda ótiledi:

Qaraqalpaq ádebiyatı muǵalliminiń qısqasha alǵı sózi menen ashıladı. Bunda muǵallim konferenciyanıń maqsetin túsindiredi. Oqıwshılardı konferenciya talapları menen tanıstıradı. Bunnan keyin konferenciyaǵa tayarlanǵan oqıwshılar ózleri oqıǵan kitapları haqqında sóylep beredi. (Berdaq, Ótesh, Omar, A.Dabılov, S.Nurımbetov, T.Qayıpbergenov, I.Yusupov,

S.Xojaniyazov, T.Mátmuratov h.t.basqalardıń shıǵarmaları). Konferenciyanı oqıw jılı dawamında eki yamasa úsh márte ótkerilse, sonıń birewin XIX

ásirdegi shayırlarǵa, birewin XX ásirdegi qaraqalpaq jazıwshılar dóretiwshıligine arnawǵa boladı. Máselen, «Abbaz Dabıl ulınıń 120 jıllıq yubileyine» arnalǵan konferenciya tómendegi úlgide ótkerilse maqsetke muwapıq boladı:

20

ÓZBEKSTAN RESPUBLIKASÍ JOQARI HÁM ORTA

ARNAWLÍ BILIMLENDIRIW MINISTRLIGI

BERDAQ ATÍNDAǴÍ QARAQALPAQ MÁMLEKETLIK UNIVERSITETI

AKADEMIYALÍQ LICEY

Ana tili hám ádebiyat kafedrası

Ózbekstan xalıq jırshısı, Qaraqalpaqstan xalıq shayırı,

Berdaq atındaǵı mámleketlik sıylıqtıń laureatı Abbaz Dabıl ulınıń 120 jıllıq yubileyine arnalǵan «Belgili shayır, talantlı qıssaxan» atamasındaǵı

Respublikalıq ilimiy-teoriyalıq konferenciyanıń

BAǴDARLAMASÍ

hám

MIRÁTNAMA

Nókis-2018

21