Зуна амрлһн

Хөн сарин чилгчәр сурһулин җил төгснә, зуна амрлһн эклнә. Эн амрлһн сурһульчнрт дала байр үүдәнә.

Цаһан гидг нертә күүкн бичкдүдин лагерьт амрхар ирв.

Өндр, нигт модд заагт хойр давхр цаһан гер зогсчана. Өөрнь цевр цегән уста һол бәәнә. Көк ноһан болн олн зүсн цецгүд шавшна. Эн өвәрц йиртмҗин бәәдл Цаһана нүд байрлулв, чееҗинь сарулдхв.

Цаһаниг лагерин һардач күүкд күн тосч ирв. Энүнә нерн Мацг Санчировна. Эн Цаһаниг күүкдин хорад орулв. Хора йир цевр. Эрс деер ке-сәәхн зургуд өлгәтә.

Өвәрц көлгн

Халун һазрт зан адус эдлнә. Бөдүн зан нег тонн аца даадг автомашинлә әдл аца зөөнә. Занын чидл йир ик. Деернь суусн күн заныг матьхр үзүртә бураһар зална.

Сависн нигт ут нооста, бөгдһр нурһта цармудыг як гиҗ нерәднә. Эдниг ут нооснь ик цаснас, киитнәс харсна. Иим цармудыг уулмудар йовхд олзлна. Өңгнь үзл уга болсн бийнь, чагчм, өндр уулмудар сәәнәр йовҗ, керг-үүл күцәнә.

Меклән ончнь

Меклә бийдән зөв керсү. Кемр хорха-хот үзхләрн, мис мет җивәд, гетәд өөрднә. Өөрдәд, генткн һәрәдәд, келәрн шүүрч авад зальгна. Меклән келнь амнлань өмн үзүрәрн залһата. Келнәннь ардк үзүрнь сул. Меклән келнлә харһсн хорха наалдҗ одна. Тер юңгад гихлә, терүнә келн деер бәәдг шүлснь өткн болчкад, зуснла әдл, юмнла наалдҗ одна. Келнләнь харһсн хорха, өтн меклән геснд орлго бәәхш.

Мекләс урһмлд сән тусан күргдг төләдән йир олзта болна. Эдниг хәләҗ-хархмн, кезә болв чигн алхмн биш.

99