Muratbay Nizanov Tanlamali shigarmalar_roman_gurrinler_drabller
.pdfGúrrińler |
241 |
|
—He?
—Qızıń aynanı qarańǵılap, dosları menen tanca oynap atır.
—Haw, ol ele awzınan sarısı ketpegen…
—Ol seniń bala waqtıńda shıǵar. Házirginiń balları tez er-
jetedi.
—Eń bolmasa bir kesa shay iship alayın.
—Kósheden suw-puw isherseń, shıǵıp tur. Seni kórse uyalıp oynay almaydı.
Kettim. Betimnen aqqan ter moynıma quyıladı. Ańqam kewip baratır. Shólim basılsın dep bir vokal gazli suw iship edim, ol
da dárhal ter bolıp, arqamnan shıqtı. Kóylegim etime jabısıp qaldı.
Qullası, basıńdı awırtıp ne qılayın, túnniń bir mezgilinde úy bosadı.
Jáne birde jumıstan sharshap kelsem, úyge úlken kelinniń anası qıdırıp kelgen eken. Negedur qabaǵı salıńqı.
—Qudaǵay, úy-ishler saw ma? — desem ernin sılp etkizdi. «Saw» degenin-ám bilmeymen, «saw emes» degenin-ám.
Divannan kópshik alıp, bir qaptalǵa jambaslayın dep atırǵanım sol, hayal:
—Neǵılayın dep atırsań? — dedi.
—Túsleneyin dep.
—Túslikti búginshe kóshe-póshede jerseń, shıǵıp tur.
—He?
—Qudaǵay menen sóylesip alatuǵın gápimiz bar.
Bilsem, kelin hayal menen gáp alısıp qalıp, soǵan anasın shaqırtqan eken.
Bul másele de «paraxatshılıq penen» sheshildi. Bunnan keyin taza kelinniń úybeti besik ákeletuǵın bolǵanda, qızımız Ánjim uzatılǵanda, quda-shaqırıqtıń sarpayları haqqında oylasıqta, qolımızdaǵı eki kelin urısıp qalıp, jarastırıwǵa qudaǵaylar kelgende sırtqa shıǵıp turdım. Bunıń menen «úyinde qádiri joq eken» dep oylamań. Jańaǵı aytılǵan máselelerdiń bári qárejet penen pitedi. Sol waqta ele biziń jaqqa kelip úlgermegen modadan baslap, duz-shırpıǵa deyin tabıw máselesinde men juwapkermen.
Bir kúni gezektegi miynet dem alısımnan kelsem, keńsede hesh kim joq. Ózim úsh-tórt kún tumawratıp, belgili kúnnen keshigińkirep kiyatır edim. Ana qapını tartaman — tas qamal, mına
16 — M.Nızanov
242 |
Muratbay Nızanov |
|
qapını tartaman — sılt etpeydi. Aqırı, qapı qaldırmay tartıp shıǵıp, direktordıń kabinetine keldim. Ashsam, jıynalıs bolıp atır eken.
— Siz shıǵıp turıń, — dedi baslıq esikten basımdı suqqanım sol. — Keyin kirerseń.
Keyin bilsem, men islep atırǵan bólimdi jawıp, ózimdi pensiyaǵa jiberiw haqqında másele qaralıp atır eken.
19.07.2016-j.
BARÍP-BARÍP ISLEYTUǴÍN «MAGNITOFON»
Radio texnikaǵa yaponnan ótetuǵını joq. Zańǵardıń balları, kósheden tat basıp jatqan temir tawıp alsa, ya televizor soǵadı, ya magnitofon. Olar soqqan magnitofonǵa tań qalmay ilaj joq. Tez júrer poezdıń aynasınan zıńǵıtsań-ám, tawıp alǵan adam biymálel ayttırıp kete beredi. Oǵan jazılǵan jazıw ózi menen birge ketedi…
Shembi kúni edi. Kewlime bir qıyal keldi de, institutta birge oqıǵan dostım Qutlımuratqa qońıraw ettim.
—Úyge kelip ket, — dedim oǵan. — Bir másláhátli gáp bar.
—Aytaber telefonnan.
—Yaq, awızdı awızǵa taqap turıp sóylesetuǵın gáp!
Keldi.
—Al, ne gáp? — dedi ol bir kesa shaydan soń.
—Gáp sol — kewlime túyip júrgen bir niyetlerim bar edi…
—Qanday?
—Maǵan húrmeti dúziw bes-altı jası úlkenim bar, solarǵa
úyden shay bermekshimen. Saǵan oylasqandaǵı maqset, sen olar menen kóbirek otırısıp júrseń, qáytip kútiw kerek, qanday taǵamdı jaqsı kóredi, usı máselede…
—Sen ádep maǵan kimlerdi shaqıratuǵınıńdı ayt, — dedi ol meniń gápimdi bólip.
—Kim dep endi.. Mádenbay, Faybıl, Tańatar, Qarmıs, Tilewbay, soń Faniybay menen Óserbaydı da qossam dep otırman. Kórgen jerde «inim, shańaraǵıńdı kórmedik-ǵo» dey beredi…
Qutlımurat mıyıǵınan kúldi.
Gúrrińler |
243 |
|
—He, nege kúleseń?
—Usılardıń basın qosa alaman dep otırsań ba?
—He?
Ol «sonı da bilmeyseń be?» degendey betime tigilip qaradı.
—Mádenbay menen Faybıl gellesin kesip alsań da bir dasturxanda otırmaydı.
—Nege?
—Solay!
—Túsindirip aytsa, nege otırmaydı? Ya biziń dasturxanda otırmay ma?
—Kimniń dasturxanı bolsa sonıń dasturxanı bolsın, otırmaydı. Sen bir, aspannan túskendey bolıp sóyleyseń. Jurt esitken nárseni sen esitpeyseń be?
—Esitsem haram bolsın!
—Erterekte Mádenbay menen Faybıl bir orınǵa qatara usını-
lıp, Faybıl ótip ketken. Mádenbay bolsa «men turǵanda Faybılǵa qayda» — dep hayalına dasturxan jaya beriwdi tapsırıp ketken eken. Nesiybe-dá! Faybıl ótip, Mádenbaydıń qoyı soyılıwı menen qala bergen.
—Oǵan Faybıldıń ne ayıbı bar?
—Háy, qoyshı, otırmaydı degen soń boldı-ǵo!
—Al, yaqshı, qalǵanları bunday illetten awlaq pa?
—Ol kim menen otırıwına baylanıslı. Máselen, Tańatar Faybıl menen «kempir soyıspaǵa turatuǵın» dos, biraq, Mádenbaydı jaqtırmaydı.
—Jaqtırmasa jaqtırmasın, bir-eki saattıń ishinde ne bolar
deyseń?!
—Ne, dasturxannıń basında urıstırıp otırajaqsań ba? Mádenbay bir nárse dese, Tańatar qırsıǵına juwap beredi. Ya bir uyat anekdot aytıp, izin Mádenbayǵa ákelip shógiredi.
—Máyli, onda Mádenbayǵa aytpay-aq qoyarman. Faybıl, Tańatar, Qarmıs, Faniybay…
—Haw-haw, toqtap tur. Qarmıs penen Fániybay mıń tilla berseń-ám merekeles bolmaydı.
—Olarǵa ne bále bolıp qalǵan?
—Qarmıstıń pátiya oqıp, sárshembi kúni ákelemen dep otır-
ǵan qızın Fániybay bazarda quwırdaq jep otırǵan jerinde aldap mashınǵa mingizip, alıp qashıp ketken. Qız Fániybaydı úsh kúnge
244 |
Muratbay Nızanov |
|
deyin qasına jolatpaǵan. Báribir endi at keshken soń… Bileseńǵo, oyaǵın!
Dúzip qoyǵan rejelerim shilpárshe boldı. Fániybay Tańatardı da jaman kóredi eken. Óserbay menen Tilewbay burın jan qońsı bolǵan. Óserbay KRUda isleydi eken. Bir kúni Tilewbaydıń mákemesin tekseriwge kelip, onıń bes jıllıq «góne shóńge»sin tapqan. Nátiyjede Tilewbay jayın satıp zorǵa qutılıptı.
Qutlımurat bulardıń bárin quyqıljıtıp aytıp berdi. Ádep qızıǵıp tıńladım da, keyin ashıwım keldi.
—Sen meniń izzetimdi qızǵanıp otırsań, — dedim oǵan qabaq shıtıp. — Men ne, olardı kórmey júrmen be? Merekede bir-biri menen súyisip kórisedi, bir-birin shetke tartıp sóylesedi..
—Oy-bu-w, oyaǵınıń nesin soraysań! Kórgende apaq-shapaq. Tap, birewi Maǵriptan, birewi Mashriqtan kelip, búgin ushırasıp atırǵanday. Lekin, hár biriniń kókireginde «yapon magnitofonları» bar. Qushaqlasıp, súyisip turǵanda-aq, sol «magnitofon-
ları» islep turadı.
Qullası, men miyman kútiw niyetinen qayttım.
—Usılardıń bárin esten shıǵarı-yıp bir jazılısayıq, —
dedim Qutlımuratqa. — Bulardıń qılıǵın esitiwdiń ózi awır eken-ǵo.
Saqıylıǵım tutıp ketip, ortaǵa eki «gúbi shiyshe»ni dúrs ettirdim. Qutlımurattıń kózi tas tóbesine shıǵıp ketti.
—Birewin isheyik, jora, birewin alıp qoy, — dedi.
—Awısqanı dasturxanda qalsın.
—Áy, qaydan bileyin… Usı nárseniń awısıp dasturxanda qalǵanın kórgenim joq.
Birinshi qadaqtı jańaǵılardıń kókiregindegi «yapon magnitofonları» islemey qalıwı ushın ishtik. Ekinshi qadaq bizlerdiń kókiregimizde onday «magnitofon» payda bolmawı ushın alındı. Úshinshisi.. Qullası, ekinshi gúbi shiysheniń yarımına deyin birimizdiń awzımızdaǵını birimiz alıp jeytuǵın dárejede tatıw boldıq. Gápimiz ekinshi yarımınan keyin buzıldı.
—Sen meni sınaw ushın shaqırdıń, — dedi Qutlımurat kózi qızarıp.
—Sen meniń izzetimdi qızǵandıń! — dedim men.
—Seniń kókiregiń qarańǵı! — dedi ol. — Bolmasa bayaǵıda
bir ret..
Gúrrińler |
245 |
|
—Óziń ne, óziń! Ele esimnen ketken joq, sol sapar…
—Hárwaq úyge barǵanıńda biziń qatındı jutıp qoyayın dep tigileseń, — dedi ol jinkózlenip.
Qullası, azanda oyansam, kóz áynegim sınıptı, kóylegim jırtılıptı. Anaday jerde turǵan lágende shashırap jayılǵan qan bar…
—Anaw ne? — dedim hayalǵa húreyim ushıp.
—He, bilmeyseń be, ne qılǵanıńdı? — dedi ol. «Otız eki tisińdi tamaǵıńa jiberemen» — dep jorańnıń úsh tisin sındırdıń ǵo.
Dım úndegenim joq. Úndeytuǵın bet qayda?! Tek ańlaǵanım sol boldı — saqlanamız dep júrsek, bizlerdiń kókireklerimizde de «yapon magnitofonları» payda bolıptı. Biraq, bizlerdiki barıpbarıp isleytuǵın magnitofon eken.
10.02.2016-j.
MEN ASHQAN JAŃALÍQ
Rayonda hákim ózgerdi. Taza hákim keldi. Burınnan kiyatırǵan ádetke bola bir ayǵa barmay gúmpildegen gáp shıqtı. Toyda da sol gáp, lazımda da. Eki adamnıń bası qosılǵan jerde taza hákimniń jumıs tártibi.
—Jigitler, ne de bolsa qıyın boldı. Hákim júdá qatal hám menmen qusaydı.
—Qatallıǵı jaqsı-ǵo, biraq, jańaǵı menmenligi shataq eken.
—Shataq bolǵanda sorama! Adam qabıllamaydı deydi.
—Qabıllamaǵanı hesh gáp. Arzańdı da oqımaytuǵın qusaydı.
—Qapılta bermeń, sonda ol ne isleydi?
—Ya-aq, sizler ǵabırıstırıp otırsız, arzańdı oqımaydı emes,
oqıydı. Lekin, ne haqqında ekeni qıyalına kirip shıqpastan, shekesine qol qoyıp jibere beretuǵın qusaydı.
— Eń jamanı — hákim ne islese, tómendegiler de sonı tákirarlap otıra beredi deydi.
Bul gáplerdi esite-esite qulaǵım «jawır» bolayın dedi. Aqırı, bul gáplerdiń anıǵına jetiwdi maqul kórdim. Oylanıpoylanıp, hákimge xat jazdım.
«Húrmetli, hákim!
Ózińiz jaqsı bilesiz, házirgi waqıtta xalıq xojalıǵınıń hámme tarawı derlik tolıq mexanizaciyalasqan. Kópshilik jaǵ-
246 |
Muratbay Nızanov |
|
daylarda jumıs kompyuter menen basqarıladı. Lekin, awıl xojalıq tarawı bul máselede biraz keshewillep atır. Sonlıqtan onı mexanizaciyalastırıwdıń jańa ádisin qollanıw boyınsha bir jańalıq oylap taptım. Bul jańalıq turmısqa asaǵoysa, qol miyneti bes márte qısqaradı, janar may úsh ese az sarplanadı. Nátiyjede dáramat bes esege kóbeyedi.
Jańa usıldıń texnikalıq hám ekonomikalıq kórsetkishi analizlengen eki betten ibarat qosımsha birge usınıs etiledi».
Xattı alıp hákimge bardım.
—Háy, háy, qayaqqa?! — dedi bir hawlıqqan dawıs hákimniń qapısına endi qol uzata bergenimde.
—Hákimge!
—Hákim búgin qabıllamaydı, buyaqqa júr!
—Yaq, kirmesem bolmaydı.
—Buyaqqa júriń deymen! Hákimniń kabineti sizge kárwan saray
emes!
Hákimniń járdemshisi meni jardan qulap keteyin dep turǵan adamdı shaqqanlıq penen qutqarıp qalǵan adamday, ántek-tánte- gimdi shıǵarıp kabinetine alıp keldi.
—Ne daw menen kiyatırsız?
—Daw emes, texnika boyınsha jańalıq usınıs etpekshimen.
—Usınısıńızdı qaǵazǵa túsiriń.
—Túsirip qoyıppan, minekey.
Ol meniń qolımdaǵı xatımdı aldı da, kóp qaǵazlardıń arasına qosıp qoydı.
—Haw, Hákimge alıp kirmeysiz be?
—Pochta kúnine bir márte kiritiledi. Keshte.
—Onda qashan xabar alayın?
—Erteńniń arǵı kúni… Yaq, kelesi hápte xabar al, eki kún ishinde xatıńızdı kórip úlgermewi múmkin.
Adamlar qurı ayta beredi eken-aw. Eki kún ishinde meniń xatımdı kórip úlgermese, demek hámme xattı da asıqpay, dıqqat penen oqıydı eken-dá.
Kelesi hápte tuwrı járdemshige bardım.
—Xatıńız keshe shıqtı, — dedi járdemshi.
—Ne dedi?
—«Tiyisli tártipte úyrenip shıǵıp, usınıs beriń» dep birinshi orınbasarǵa jiberdi.
—Birinshi orınbasardıń kabineti qayaqta?
Gúrrińler |
247 |
|
—Oǵan asıqpań. Xatıńız ele dizimnen ótedi. Soń keshki pochta menen kiritiledi. Onıń-ám, seniń xatıńdı oqıwdan basqa jumısı
joq pa? Jaqsısı, on kúnnen keyin kir, anıq juwap alasız. On kúnnen keyin bardım.
—Xatıńız keshe shıqtı, — dedi birinshi orınbasardıń járdemshisi.
—Ne dedi?
—«Tiyisli tártipte úyrenip shıǵıp, usınıs beriń» dep awıl
xojalıǵı boyınsha orınbasarǵa jiberdi.
Bul orınbasar rayonǵa tiyisli tógindi alıp qaytıw ushın Nawayıǵa ketken eken. Eki háptede aylandı. Kelgennen jaǵasınan alǵan bolmayın dep jáne bir úsh kúndi araǵa salıp bardım.
Qatardaǵı orınbasarda járdemshi bolmaydı eken. Ózi qabıl etti.
—Xatıńızdı keshe «tiyisli tártipte úyrenip shıǵıp, usınıs beriń» dep texnikalıq qadaǵalaw bólimine jiberdim, — dedi ol.
—Aqırı, ol burın úyrenilip…
Ol meniń sózimdi aqırına deyin ayttırmadı. Texnikalıq bólimniń kabinetin siltedi.
Kabinettiń awzına shappattay qaǵaz qıstırılǵan eken. «Bólim ǵawasha tárbiyasında».
Sonıń menen hámmesine qoldı bir sermep, úyge qayttım. Aradan eki aydan aslam waqıt ótti. Xattı da, juwaptı da umıttım. Bir kúni keshte awılımızdıń fermeri Mańǵıtbay keldi. Qolında meniń xatım. Shekesinde ıbır-jıbır jazıwlar: «Tiyisli tártipte úyrenip shıǵıp, usınıs beriń». Eń sońında Mańǵıtbayǵa
da sonday tapsırma berilipti.
—Bunı neǵılaman? — dedi ol hayran bolıp.
—Neǵılatuǵın ediń, usınıs bereseń.
—Ne dep usınıs beremen.
—Bolmasa bılay et, xattıń shekesine «Tiyisli tártipte úyrenip shıǵıp, usınıs beriń» dep meniń atıma jaz.
Mańǵıtbay qatını ul tuwǵanday quwanıp ketti. Sol jerdiń ózinde irsek-tirsek etip jazdı da, qolıma uslattı. Sonıń menen «quda da tınısh, qudaǵay da tınısh».
«Xalıq aytsa qalpı aytpaydı» degen ıras eken. Xattı itibarsız oqıǵanı ushın qattı quwandım. Sebebi men ashqan jańalıq bunnan jigirma jıl burın-aq óndiriste bar edi.
03.05.2016-j.
248 |
Muratbay Nızanov |
|
«ÓMIRBEK»TIŃ TANÍSLARÍ
Joldaslarımnan keshigip qalıp, rayondaǵı bir qıymas dostımnıń toyına bir ózim bardım.
—Pay jora, sál keshiktiń dá! — dedi dostım qolımnan qısıp.
—Seniń jigitlerińe házir ǵana ekinshi awqatın tartıptı.
—Zıyanı joq. Bir tarelka awqat bolsa qarnım toyadı.
—Yaq, onday qılma. — Ol xızmette juwırıp júrgen jeńil ayaq bir jigitti shaqırdı. — Sen mına aǵańdı Ótámbettiń úyine apar. Sóyt te Ótámbetke ayt, kastryulin alıp kelsin, palaw tayar boldı.
Ótámbettiń úyinde men qatarı, mennen biraz jası úlkenirek onlaǵan adam otır eken. Kók shayǵa toyǵan, onıń ústine tentek suwdan da biraz ketken qusaydı. Áńgime dúkan qızıp atır eken. Meniń bergen sálemime salqın juwap beristi de, áńgimelerin kelgen jerinen dawam etti. Jaydıń bir japsarında úlken ekranlı televizor. Onda «Ómirbek hám tazsha» spektakli bolıp atır. Otırǵanlardıń áńgime dúkanı da ekranda kóringen «Ómirbek» haqqında ketip atır eken.
Kimdur gápti kese belden qoyıp qaldı.
—Men, ana ıshtanınıń dizesi órim-órim bolıp júrgen awmaqay jigitke qayıl qalaman dá! — dedi, ház etip kúlip. — Ómirbektiń aldaǵanın túsinbey qoradaǵı aq qoshqarın soyıp ákeliwin qarasesh onıń!
Bul bayǵus qádirsizlew adam qusaydı. Gápine hesh kim kúlmedi, maqullamadı da.
—Sen áńgimeniń beline teppey tursa, — dedi tórge taman otırǵan buǵaǵı salınǵan bir kisi. — Sol Ómirbek meniń tuwısqan bólem boladı. Onıń anasınıń atı Orıngúl. Meniń anamnıń atı Sarıgúl. Sarıgúlden kishkentayınıń atı Qánigúl. Qánigúlden kishkentayı Jánigúl, Jánigúl biraq jaslay qaytıs bolǵan.
—Ómirbektiń ákesi Qosımbet meniń ákemniń jan jorası edi,
—dep gápke qosıldı jańaǵı Ómirbektiń bólesinen eki tis tómen
otırǵan birew. — Óle-ólgenshe biziń ákem menen qatnasıp ketti. Bir qıdırıp kelse úsh kúnge deyin miyman bolatuǵın edi.
—Biyzar-ám bolǵan ekensiz-dá! — dedi, esik bettegi qonaqlardıń biri.
—Yaǵaw, qayta qosıq esitip, ház etip qalatuǵın edik. «Qosımbet keldi» dese awıldıń adamları jıynalıp qaladı. Qara úyge
Gúrrińler |
249 |
|
sıymay ketedi. Keyin úydiń arqasın ashıp, jabıqtı túrip qoyıp esitetuǵın edi. Qıssa jolına onnan ótetuǵın adam qaraqalpaqta joq. Meniń esitiwimshe Qáwender bala usı Qosımbetten pátiya alǵan deydi.
—Kelispegen gápti aytpa, — dep, onı Ómirbektiń bólesi qaytarıp tasladı. — Qáwender balanıń súyegi sipse bolǵanı qashshan! Qosımbettiń ólgeni keshe-ǵo. Óz qolım menen qoydım. Molla «górge túsiwge qorqaman» dep maǵan jabısıp aldı. Qoydım men, ne boptı! Erteń hámmemiz de túsemiz-ǵo.
—Ómirbektiń ózinde baqsıshılıq ta bar ma deymen.
—Ha-aw! Ákesi qonıp jatıp qıssa oqıp júrgen bolsa, ol baqsı bolmay kim boladı.
Negizinde ondaǵı hawaz ákesinen emes, anasınan ótken deydi, — dep, palaw tartılǵan waqıtları gápke taza «informator» aralastı.
Ol Ayımbet degenniń altı uldan keyin tuwılǵan úlken qızı eken. Sen-ám tanıysań ba? — dedi Ómirbektiń bólesi.
—Men sol Ayımbettiń inisi Bayımbettiń qızınan tuwılǵan balanıń qızınıń qáyinbiykesi-niń jiyenimen-ǵo. Onıń ústine Ómirbek penen qatnasıp otırman. Jaqında kelin menen qıdırıp kelip bir túyetawıǵımdı jep ketti. Qıtaydan keshe keldik, — dedi sonda. Usı pesanı uyǵırlarǵa aparıp kórsetip qaytıptı.
Endi buǵan ne derseń?! Bul pesanıń qoyılǵanına otız jılǵa shamalasqan bolsa. Házir sol «Ómirbegi» bir júz jigirma kiloǵa tas sındıratuǵın eliwden ótken kisi bolsa, onıń ústine qazı bolıp oynaǵan Maqset penen Tawasar baydıń hayalı Marjan qaytıs bolıp ketken bolsa… Qáytse de házir olardıń gápin bóliw lawlap
turǵan otqa suw quyǵan menen barabar edi. Ne de bolsa túwesilip, janıp bolsın, qolamtaǵa aylanǵan waqta aralasarman dep jım otırdım.
—Zańǵardıń balası, ózine de quday bergen-aw, bir ózi bes adamnıń ornına dawıs shıǵaradı.
—Hayal bolıp aytınıp jılawın aytpaysań ba?
—Meniń esitiwimshe ákesiniń ózi qatın dawıslı erkek bol-
ǵan deydi.
— Yaǵaw. — Gápke baǵanaǵı jorasınıń balası aralastı. — Men jaqsı bilemen-ǵo. Qosımbet «Há, yarsane-á-áy!» dep órnekte turıp qaytarǵanda, dawısı «Qálli jaǵıs»qa baratuǵın edi. — Meniń esitiwimshe Qosımbettiń ákesi Esimbet, Esimbettiń ákesi
250 |
Muratbay Nızanov |
|
Dúrsimbet degen adam bolǵan. «Dúrsildek qaynaǵa» deydi eken kelinleri.
— Ana jigittiń aytqanı tuwrı.
Ómirbekke hawaz anasınan ótken, — dedi «bólesi». Óydegenim, onıń ana tárepi tuqımı menen xosh hawaz edi. Hátte,
meniń anam «Hiygalay»dı aytqan waqta Nókistiń artistleri eńbeklep kelip qolınan súyetuǵın edi.
«Nókis» degen gáp tilge alınǵan waqta tórdegi jası úlkenniń kózi meni shalıp ketti.
—Sen inim qayaqtan keldiń? — dedi.
—Nókisten, — dedim.
—Onda sen bulardan góre jaqsıraq bileseń-ǵo, Ómirbekti. Mına otırǵanlar hár qaysısı hár jaqtan jıynalǵan, onıń ústine tentek suw awzına tiygen soń ne sóylegenin bilmeydi. Sóytip, inim, Ómirbek qayaqta bul kúnde?
Kúni menen aytıp otırǵanları ıras bolsa, bul jerde «Ómirbek»tiń bólesi de, jiyeni de, dayısınıń balası da, jorasınıń inisi de barshılıq edi. Ne de bolsa bulardıń qanshelli aǵayinshiligi bar ekenin bilgim keldi.
—Ómirbek áp-ánendey jumısına barıp-kelip júrip edi, — dep, irkilip qaldım.
—He, ne boldı?
—Keshe uslanıp qalıptı.
—Nege?
—Kóp jıldan beri narkotik zatlar satıw menen shuǵıllanadı eken. Úyin tintken eken, bes kilo tiryek shıǵıptı. Miliysalar «bul bolǵanı emes, barlıq aǵayin-tuwǵanların, jora-joldasların, tamır-tanısların qaldırmay tintiw jasaw kerek» depti. Sóytip keshe tún jarpında biziń úydi de tintip ketti. «Máyli, siz taza ekensiz, biraq, Ómirbektiń dayısı bar ma, jiyeni bar ma, bólesi bar ma, bilgenińdi bizge jazıp ber» dep ketti» — dedim.
Otırǵanlar sam-saz bolıp qaldı. Men qoynımnan bloknot penen ruchka shıǵardım.
—Yashullı, siz tuwǵan bólesimen dep pe edińiz? — dedim baǵanaǵı yoshıp otırǵan kisige.
—Qoysań-á qosshım! — dep ol shorshıp tústi. — Kópshilik
jıynalǵan jerde ne aytılmaydı?!
— Siziń ákeńiz Qosımbettiń jan-jorası bolǵan-ǵo.