3. Салықтық тексеру нәтижелеріне және салық органдары лауазымды адамдарының іс-әрекеттеріне (әрекетсіздігіне) шағымдану тәртібі.

Салық төлеушiнiң (салық агентiнiң) салықтық тексеру нәтижелерi туралы хабарламаға шағымы салық қызметiнiң жоғары тұрған органына салық төлеушiге (салық агентiне) хабарламаны тапсырған күннен бастап отыз жұмыс күнi iшiнде берiледi.       Бұл ретте салық төлеушi (салық агентi) шағымның көшiрмесiн салықтық тексеру жүргiзген салық органына жiберуге тиiс.

Салық қызметi органына шағым беру күнi оны беру тәсiлiне қарай:

1) өзi келу тәртiбiмен – салық қызметi органдары шағымды алған күн;

2) почтамен – почтаның немесе өзге де байланыс ұйымының қабылдау туралы белгiсi қойылған күн болып табылады.

Белгiленген мерзiмдi дәлелдi себеппен өткiзiп алған жағдайда шағым берушi салық төлеушiнiң (салық агентiнiң) өтiнiшi бойынша шағымды қараушы жоғары тұрған салық қызметi органы бұл мерзiмдi қалпына келтiруi мүмкiн.

Жоғары тұрған салық қызметi органы өткiзiп алған шағым беру мерзiмiн қалпына келтiру мақсатында оған қатысты салықтық тексеру жүргiзiлген жеке тұлғаның, сондай-ақ салық төлеушiнiң (салық агентiнiң) басшысының және (немесе) бас бухгалтерiнiң (ол болған жағдайда) науқастанып қалуын дәлелдi себеп ретiнде таниды.

Жоғары тұрған салық қызметi органы шағымды мәнi бойынша қарауды аяқтаған соң жазбаша нысанда дәлелдi шешiм шығарады және оны салық төлеушiге (салық агентiне) жiбередi немесе тапсырады, ал көшiрмесiн салықтық тексеру жүргiзген салық органына жiбередi.       Салықтық тексеру нәтижелерi туралы хабарламаға салық төлеушiнiң (салық агентiнiң) шағымын қарау қорытындысы бойынша жоғары тұрған салық қызметi органы мына шешiмдердiң бiрiн шығарады:

1) шағым жасалған салықтық тексеру нәтижелерi туралы хабарлама өзгерiссiз, ал шағым қанағаттандырусыз қалдырылсын;

2) шағым жасалған салықтық тексеру нәтижелерi туралы хабарламаның толық немесе бiр бөлiгiнiң күшi жойылсын.

Шағымды қарау нәтижелерi бойынша шағым жасалған хабарламаның бiр бөлiгiнiң күшi жойылған жағдайда салықтық тексеру жүргiзген салық қызметi органы салықтық тексеру нәтижелерi туралы хабарламаға және (немесе) хабарламаға шағымды қарау нәтижелерi бойынша шығарылған жоғары тұрған салық қызметi органының шешiмiне салық төлеушiнiң (салық агентiнiң) шағымын қарау қорытындылары туралы хабарлама шығарады және оны осы Кодекстiң 607-бабында белгiленген мерзiмде салық төлеушiге (салық агентiне) жiбередi.

Салық кодексінде белгiленген негiзде және тәртiппен шығарылған жоғары тұрған салық қызметi органының шешiмi салық органдарының орындауы үшiн мiндеттi.

Салық төлеушiнiң немесе оның уәкiлеттi өкiлiнiң жоғары тұрған салық қызметi органына немесе сотқа салық қызметi органдары лауазымды адамдарының әрекетiне (әрекетсiздiгiне) шағым жасауға құқығы бар. Салық қызметi органдары лауазымды адамдарының әрекетiне (әрекетсiздiгiне) Қазақстан Республикасының Заңдарында көзделген тәртiппен шағым жасалады.

Салық қызметi органдарының Қазақстан Республикасы салық заңнамасының бұзылуына кiнәлi лауазымды адамдары Қазақстан Республикасының заңдарында белгiленген тәртiппен жауаптылықта болады.

11-тақырып. Корпорациялық табыс салығы. Жеке табыс салығы. Қосылған кұн салығы.

Дәріс жоспары:

1. Корпорациялық табыс салығы. Салық салу объектісі, салық субъектілері. Салық салынатын табысты анықтау тәртібі.

2. Жеке табыс салығы. Салық салу объектісі, салық субъектілері, салық базасын айқындау тәртібі, салықты есептеу және төлеу тәртібі. Табыс салығының ставкасы. Табыс салығы бойынша жеңілдіктер.

3. Қосылған құн салығы (ҚҚС). Салық салу объектілері. Салықты төлеушілер. Салық базасын айқындау тәртібі, салықты есептеу және төлеу тәртібі. Салықтық кезең. ҚҚС ставкалары.