Добавил:
Upload Опубликованный материал нарушает ваши авторские права? Сообщите нам.
Вуз: Предмет: Файл:
Каски-ХХ.doc
Скачиваний:
4
Добавлен:
01.05.2025
Размер:
3 Мб
Скачать
☆

То ыджыт, то учöт

Делоыс вöлi тöлöн. Ме доддя вöлöн муна, бокам тёткаö пидзöс вылас сулалö.

Ме туй кузя муна, а ывтiжык, ордчöн, лямпаэз вылын морт котöртö. Думайтi, Ваня Левченко ысласьö, горöтла сылö. А сiя — кылö я, оз кыв я — сё одзлань пöльтö.

Видзöта — эстöн мыйкö неладно. И быль: ысласисьыс пондiс вежмасьны: то пу сувда, то копна ыжда, то пу сувда, то копна ыжда.

Мунiс-мунiс и эз ло, дзик лымас вöйис.

Этö вöрись дядька вöлi.

Пон кучика вöрись

Кытшöмкö годö татiсь инька öшлiс. Мунöма чочком воронеч кошшыны да ылалöма вöрас. Ветлöтöв-керас да учöтик понöс панталас. И радуйтчö: понокыс горт деревнясис, тöдса, сыкöт и петас деревняас.

Тявгö понокыс, бытьтö корö сьöрас петны: муныштас, муныштас да бöр бертас, и мунас мортыт понокыс сьöрö.

Локтасö куторö не куторö — керку-мöд эмöсь. Пон öтiк ворота увтö пырыштас и абу. А воротасис морт петö — вывтас паськöмыс чегö: барин — барин и эм! И корö инькасö:

— Лок жö пыр да шоччись!

Оз бы инькаыс пыр, а мыйкö кыскö сiйö керкуас, дзик кöлöт. И пырас посöдзас, а сэтöн — куим кöин паныт сувтасö. Мужык нылö кыдз горöтас: «Сыть!» — и кöиннэс шымырöн-шымырöн мунасö одзсис.

Инькаыс повзьöмувъяс бут-бат пернапасасяс. Сэк жö гым-гым гымыштас — и инькаыс аслас лён муок дорын лоас.

Вöрисьыс пон кучикö пасьтасьлöма, мöдöма инькасö гортас пыртлыны.

Гитлерка

Кытшöмкö годö вöлi Анисимись савдатöс лешачикаыс, гитлеркаыс, кутöм да Иньва сайö вуджöтöма. Поди сэтчин вöрас сылöн гортыс и эм, поди и пыртлiс мужыктö керкуас, мийö эд ог тöдö, кыдз вöлi.

Куим лун сiйö, ранитöм кокасö да контузитöмсö, сьöрас новйöтöма, вöлись висйыштöма Ык уссёö. Дак эд сiдз новйöтöма гитлерка — мужыкытлöн сапог каблукыс и подошваыс досповна бырöмась!

Куим год пö война вылöт ветлöтi, да этадз сапоггесö эг бырöтлы.

Сiя эд не Ваничика, а лешачика!

Сылö орсöм, а мортыслö — горзöм!

Вöрисьлöн инь кодь

Мужык мунöма верöс вуж шедтыны (сiя небыт и ён, сiйöн мордаö домавлiсö шать). Шедтö, а поныс кинöскö вувтö — сёйны готов. Видзöтö мужыкыт и аддзö: кинкö кöз вылö ляч пасьтöм кайö.

«Васно кульпиян, — думайтö вуж шедтiсьыс. — Ноко ветла».

Мунас, а сэтчин — инька. Мужык öлас понсö да шуö сылö:

— Лэдзчы улö, оз пур.

— Пасьтöм да.

— Ме сякöй пасьтöммесö аддзывлi, ог повзьы...

Но, пасьтöмыт и лэдзчас кöз вывсис да висьталас.

— Ме лешак дынiсь пышша.

Сiйö инькасö вöрись видзöма инь туйö. Мужыкыт вöлi сетöма шабурсö да лэдзчöтöма инькасö деревняас.

Вöрись ордын

Инька локтö базарсянь, нин вайö, а вöлыс дыш — мунö и оз. Шатьöн вурас, вурас, а сiя рып-рып керас да бöра и оськöлöн мунö.

— Лешаклöн тэ вöв, — видчö инькаыс, — мыла ни бырис тэкöт!

Пантасьö мужык, бура пасьтасьöм, токо шапкаыс ыджыт и ыджыт.

— Мый, оз мун вöлыт? А ноко ме пондыла вашöтны, — да кыдз чупнитас, ныкнитас — вöлыс скач пондас гöнитны.

Оз и казяв инькаыт, кыдз деревняас локтас. А сэтöн бöра жö сiя мужыкыс пантасьö да кинас мыччалö, кытчö кежны. Видзöтö инька: не горт деревняас локтöма и не аслас оградаö пырö. Тпрукнитас бы вöлыслö — оз вермы; вожжинас бы сувтöтас — оз вермы. Сiдз и пырас оградаас, вöвсö сэтчö коляс, ачыс мужыкыс сьöрö керкуас мунас. А керкуас югыт и югыт.

— Тэ тай кынмöмыт, — шуö мужыкыс и удö шоныт брага. — Шонтiсь-ко.

Босьтас инькаыс кружкасö — быгыс сильöтö, чöскыт, тыдалö, брагаыс. Кыдз сэтшöмсö он ю? Кыдз велалöм, юöм вотöдззас пернапас пуктас. И сэк жö керкуыс öшас — не мужык, не брага кружка абу. Пондас нёджжасьны инькаыт, аддзö: пукалö аслас додьын, нин юк вылын, а вöлыс пу бердö кöрталöм.

Шöри повзяс инькаыс — чуть оз кув. Öдва чеччас местасис, пöрччалас вöвсö пу бердсис да шуас: «Петкöт, батюшко вöв, гортöдз!»

И петкöтас эд вöлыс!

А кöбы эз — колис бы вöрисьыс инь туйö.