Куим сой

Оласö-вöласö пöрись гозъя. Нылöн вöлöмась куим ныв. Кык нылыс вöлöмась дышвевъяöсь. Быд уджö нiйö ковлöма наредитны, да эшö мукöд кадас наредитöмсö кывзöны умöля. А куимöт нылыс, медучöтыс, сойес коласын вöлöма медудав. Эта понда сiйö сойес абу радейтöмась: тэныт пö миянся ыджытжыкö окота пуксьыны да сiйöн пыр выкваляйтчан — быд уджын мылькйöн каян.

Кыдзкö эна куим сойлöн пöрись айныс пондас шогавны. А шогалiкö мортлöн сьöлöм кошшисьö. Усяс стариклö тöдвылас озъягöд. Не весь шуöны: шогалiсь да челядь, вай тэ сылö ягöд кöть кытiсь да и быдöс.

Мунасö ягöдавны куим сой. Кык сойлö дыш öктiсьны: то нiя кыдз увтö пуксясö, то басöк дзоридззезiсь юркытшшез кыясö да асьнысö баситасö. А куимöт сойыс, медучöтыс, истово шила: öтiклаись да мöдiклаись öктас, кöдкоста ягöдöн дозсö и тыртас.

Локтасö гортаныс. Кык сойлöн доззэс простöйöсь, а медучöтлöн — чукöрöн. Пондасö ай-мам ошкыны нывнысö, а пöрисьжык сойезлö эта нелюбо.

Вот мöдпырся айныс пондас ныввесö ыстыны ягöдавны. Мунасö бöра куим сой. Медучöтыс ассис дозсö кöдкоста и тыртас да и гортас локтас, а пöрисьжык сойес лунтыр ветлöтасö-ветлöтасö и кöть бы öтiк ягöд тусь ваясö. Пондасö бöра ай-мам ошкыны ассиныс медучöт нывнысö, сарапан сылö босьтны кöсйöны. А пöрисьжык сойес эта понда пиннезнысö сы вылö йирöны.

Пондас айныс куимöтпырся ыстыны ныввесö ягöдавны. Ныввез мунасö. Медучöт сой бöра медодз тыртас дозсö ягöднас и лöсьöтчö бертны гортас. А кык пöрисьжык сой эта коста сiйö вöджжасö да туй дорö виясö, доз сылiсь уна торйö поткöтласö да вöрö чапкасö, а ягöд шöриаласö, асьсö сэтчö жö туй дорас кыдзок увтö дзебасö.

Локтасö гортаныс кык сой, ай-мам нылiсь юалöны: кытöн пö сойныт? А нiя бытьтö нем оз и тöдö: эз я пö лок гортö, сiя пö эд одзжык миянся дозсö тыртiс, непременно пö эд инö кытчöкö мöдiк туй вылö ылалiс да öшис. Виччисясö нывнысö лун, виччисясö кыкö, сiдз и думайтасö, тыдалö пö öшис.

Чулалас ар, а сыбöрын тöв. Локтас тулыс. Пöрись ай веськалас и ягöдалан туй кузя мунас кыдзкö мöссэзла. Локтас вöр дорö, аддзö: лапытик кыдзок увтын зэв басöк зорагум быдмöм. «Ок тэ, — думайтö, — пöляныс кытшöм басöк, сё ни старукаöлö вая».

Кыскас пуртöсiсь пурт и пöлянсö вуж бердöт вундыштас. Öм дорас вайöтас да кыдз пöльыштас, пöлян пондас морт голосöн люлльöтны-висьтасьны:

Маминьöй тэ менам, гажа шондiиньöй,

Айиньöй тэ менам, мича тöлiсиньöй,

Быдтiт нывнытö тай, кыдз ва пöткаöс,

Да и öштiтö гожся асылö.

Гожся асылыс рöма дзардöтö,

Веж кыдзок вылын басöк кай дзульзьö.

А кыдзок увтас куйлö мича ныв;

Сылiсь бöрдöмсö эд некин оз кыв.

Ой тэ, маминьöй, гажа шондiиньöй,

Ой тэ, айиньöй, мича тöлiсиньöй,

Да тi кывзö жö нывлiсь нор кывсö,

Воштö сьöлöмöдз сылiсь причётсö.

Куим сой тай мийö вöлiмö,

Ягöдавны тай öтпыр мунiмö.

Кыдз я öт сойö вöлöм öт лёк звир,

Кыдз я мöд сойö вöлöм мöд лёк звир.

Нылö вексö тай етша вöлöма,

Нылö лолö тай менам колöма.

Боксянь кыйöмöн менö вийисö,

Лапыт кыдз увтö менö кундiсö,

Öктöм ягöдöс шöриалiсö,

Öктiсян дозöс вöрö чапкисö.

«Но, мыся эттшöм пöлян! — дивуйтчö пöрись ай. — Ассим век ола, а эттшöм чудосö эг на аддзыв». Босьтас бöра, öм дорас вайöтас — пöлян бöра сiйö жö висьталö. «Чöв ужо, ме иньöлö мыччала», — думайтö пöрись морт.

Сюйыштас пöлянсö пиас и локтас гортас.

А гортас семъяыс токо ыб вывсянь öксьöма. Иньыс гор лонтö да няняшыд пуö, ныввез лöсьöтöны пызан вылö.

Вот старик пырас да иньыслö пöлянсö писис и сетас.

— На жö, — шуö, — ме тэныт пöлянсö кытшöмö вайи.

Иньыс босьтас да кыдз пöльыштас. Пöлян бöра и люлльöтö:

Маминьöй тэ менам, гажа шондiиньöй,

Айиньöй тэ менам, мича тöлiсиньöй,

Быдтiт нывнытö тай, кыдз ва пöткаöс,

Да и öштiтö гожся асылö.

Гожся асылыс рöма дзардöтö,

Веж кыдзок вылын басöк кай дзульзьö.

А кыдзок увтас куйлö мича ныв;

Сылiсь бöрдöмсö эд некин оз кыв.

Ой тэ, маминьöй, гажа шондiиньöй,

Ой тэ, айиньöй, мича тöлiсиньöй,

Да тi кывзö жö нывлiсь нор кывсö,

Воштö сьöлöмöдз сылiсь причётсö.

Куим сой тай мийö вöлiмö,

Ягöдавны тай öтпыр мунiмо.

Кыдз я öт сойö вöлöм öт лёк звир,

Кыдз я мöд сойö вöлöм мöд лёк звир.

Нылö вексö тай етша вöлöма,

Нылö лолö тай менам колöма.

Боксянь кыйöмöн менö вийисö,

Лапыт кыдз увтö менö кундiсö,

Öктöм ягöдöс шöриалiсö,

Öктiсян дозöс вöрö чапкисö.

— А мый эта! — иньыс шуö, — ме тай век ассим ола, а эг на аддзывлы эттшöм пöлянсö. Тэ кысь сiйö, старик, вайин?

А кык сой жöв керсясö да кывзöны. Шöрöт сойыс пондас мамыслiсь корны: вай жö пö, мама, и ме пешлышта, мыся бытьтö сэтшöм пöлян. Босьтас да öм дорас вайöтас. А пöлян бöра и шувлö:

Ок тэ, сойиньöй, вöрись мустöм звир,

Мыля кисьтiн тэ менчим, томлiсь, вир?

Мыля эн сетышт меным олыштны,

Гожся луныслiсь шондi аддзывны?

Мыля лöг тэнат петiс ягöдлö,

Мыля видзöтiн пöрись сойытлö?

Нывка повзяс эна кыввезiсь да чожжык пöлянсö сетас пöрисьжык сойыслö.

Пöрись сойыс босьтыштас пöлянсö öмас да кыдзи пöльыштас — пöлян сылö и шувлö:

Уна лёк звирыс дзибъя вöр шöрын,

Уна лёк аркмö-овлö ны шöрын,

А тэсся лёкжыкыс некытöн абу!

Нывка лöгасяс да пöлянсö шурк шупкас горö. Пöлян чиж-важ, чиж-важ пондас сотчыны. Друг пöлян пытшкись джодж шöрö чеччöвтас зэв басöк нывка. Ай-мам пондасö видзöтны: медучöт нывныс вöлöма.

Пондасö вöлись пöрись гозъя радувъяныс синва кисьтны.

А кык сойлö стыд лоас да токо öтöрö. Ай-мам нiйö ёрдасö: мед пö век нiя му кузя мустöм звиррезöн и шатласясö, мед пö век нылö не тöдны морт олан, не аддзывны гажа лун.

И пöрас öт нылыс — пöрисьжыкыс — кöинö. Öнöдз кöинöн ветлöтö, öнöдз мича ойезö уннялö, бертö морт оланö жö бы, да некысь вайнытö.

А шöрöт нылыс пöрас ручö. Котрасьö руч, бöжнас öвтö, кытöн кöч кутö, кытöн курöг джагöтö. Окота бы сылö бöр мортö пöрны, да некысь вайнытö.