Грек шедтiссез

Локтö гортас савдат. Вот сiя öтiк деревняын пырас дöва ордö. Дöва сiйö вердас, юкталас да шоччисьны лэдзас. Узяс, узяс савдат да и дöваыс дынö кыссьыны пондас. Сiдз и этадз сибалö бы, да инькаыс асьсö строгöя видзö:

— Эн и думайт сэтшöмсö — нем оз пет!

Дöва пондас ырöш сысъявны да чунькытшсö чöвтас и пуктас джадж вылö. Савдат аддзылас этö да гусялас чунькытшсö. Кватитчас инька! — да и шуö:

— Тэ эд ыжмалiн, савдат?

— А кин нö сэсся? Ме.

— Сет öнi жö чунькытшсö!

— Бокат лэдзан, дак сета. Чунькытшыс дона вöлöма, вот инька и шуö:

— Перво попыслiсь юала, мый сiя эта вылö висьталас. Инька юалас попыслiсь:

— Батюшко, позьö я талун дöвалö грешитыштны? Поп шуас:

— Талун позьö, токо перво ме вовла. Инька шуас поплö:

— Перво протопопыслiсь юала, позьö я тэкöт, да вöлись висьтала.

Юалас инька протопоплiсь, а сiя шуас:

— Талун позьö, токо попысся одзжык ме вовла. «Мый тэ ныкöт пондан керны? — думайтö инька. — Но, ладно, видзöтам сэтчин...»

И керас сiдз: поплö час бöртi дöва ордö локны, протопоплö — кык час бöртi, а савдатлö висьталас:

— Попыс эз панöвт, токо, шуö, луннас эн грешит. Тэ öнi ветлöтышт кытöнкö, а рытъявнас локтан миянö.

— Сiдз и керам, — шуас савдат да мунас гуляйтны. Вот лоас кад, и поп дöва ордö мунас.

Дöва самовар бы сувтöтö, а ваыс пö кайöттöм. Виччись, шуö, батюшко, вала котрася — кадсö нарошно каттьö.

Ветлас ваысла, а сэтчö протопопыс нырсö мыччö ни — тожö оз пукöт гортас.

Инька повзьöмöн юöртö:

— Батюшко, батюшко, протопопыс миянö локтö. Мый пондам керны?

Поп сiдзжö повзяс да шуö:

— Кытчöкö сайöвт менö!

Инькалöн паськöм видзан коробъяэс чуланын пустойöсь, сiя дзебас попсö öтiкас, замокöн игналас.

Локтас протопоп, ветлöтыштлö да тырппесö нюлö. А кöзяйка и сылö висьталö:

— Счас самовар пизьöтам да чай юыштам. Токо öшмöс дорöдз котрася, виль ва вая.

— Чайсö мöдöтчид юам.

— Сiдз оз лöсяв, батюшко.

— Но, ветлы инö.

Токо ваяс васö инькаыт — савдат локтö. Бытьтö повзяс кöзяйкаыс да и шуö:

— Батюшко, батюшко, миянö савдат локтö! Мый пондамö керны?

— Дзеб кытчöкö менö. Да савдатсö дыр эн видз. Инька сюйыштас протопопсö мöдiк коробъяö, замокалас сiйö, ачыс керкуас котöртас.

Савдат каяс посöдзö и чуланiсь кылас кытшöмкö шыэз. (А мый оз кыв, кöр коробъяас, дзик гробын, поппес куйлöны!)

Пырас савдат керкуас да и шуö:

— Чуланат, тыдалö, заптöм яй эм, и кань бöбалö.

— А мед бöбалö, каньыс унасö оз сёй.

— Кöть мымда, а оз ков лэдзны, — шуö савдат. — Муна вашöта.

Инька быднёж пондылас савдатсö видзны, медбы эз пет чуланас, а савдат сёроно петас. Пырас чуланас и вежöртас, што коробъяын кинкö вöрöтчö умöлика. Бертас керкуас да кöзяйкаыслö сы йылiсь висьталас. Кöзяйка пыксяс-керас жö бы, да савдат сёроно сiйö чуланас петкöтас да осьтас коробъясö — сэтöн кулöм морт! Мöдсö осьтас — бöра кулöм морт!

И попыс, и протопопыс пöдöмась.

Лöгасяс савдат, ыксö:

— Тэ мортвийись, тэнö судитны колö!

Мöдыс öлö савдатсö:

— Эн ыксы, сэтöн и тэ виноват. Кöбы эн гусяв чунькытшöс, этатшöмыс эз бы и пет.

Сэтчö керку одзас вöлöн локтасö. Этö купеч вöзйö товар. Видзöтасö — кык коробъя сылöн. Дöва купечыслö шуö:

— Миян тожö бур товар эм и тожö кык коробъяын. Вай баш на баш вежсям — видзöтны ог пондö.

Купеч мыйкö думайтас жö да горöтчас: — Вежсям. И бöр ог пондö керсьыны.

Вежсясö, и купеч вашöтас вöвсö одзлань.

Савдат да дöва осьтасö öт коробъясö — сэтöн ыджыт из куйлö. Осьтасö мöдсö — пессэзöн тыртöм.

Купеч мунöв-керас да видзöтас öт коробъясис — сэтöн морт шой! Видзöтас мöдсис — мöдiк морт шой!

То тай кыдз бöбöтчынытö!

Бöр бертны купеч оз лысьт — эд ачыс савдат-дöвася абу буржык!

Пöдналас коробъяэсö, кежöтас вöр коласö да чапкас.

А савдат эта бöрсянь и чайсö оз понды юны — недолыт сьöлöм вылас. Да и кадыс, видзöт, сылöн бырсьö: чожжык гортö колö ветлыны да бöр казармаас бертны — сетас дöваыслö чунькытшсö да мунас одзлань аслас туй кузя.