Китрöй мужык

Поп некинöс абу примитлöма гривенниктöг, вичку дынас матö абу сибöтлöма. А öтiк мужык некöр сьöмсö эз ваявлы да и нем вайнытö вöлi: олiс öтнас, некытöн эз уджав. Вот сiя и горöтчöм кинлöкö, што сылöн вöвжугыс не назём керö, а сьöм лэдзö гырксис. Кылас эта йылiсь поп. Но, а поппес, тiйö асьныт тöдат, вежалiсь отир. Поп кутас да и висьталас попаддялö сэтшöм чудосö, а попаддя пельсадьсö орöтö поплiсь, тшöктö небны мужыкыслiсь вöвсö. Поплö жаль сьöмсö видзны и вöзйö ассис медбур вöвсö, вежсьö бы мужыкыскöт. Мужык гыж-гыж керас юрбöрсö и думайтö: «Ладно, менам назёмыс картатыръяс ни, а попыслöн етша, тыдалö эшö. Ась босьтö назёмкерисьсö менчим».

Поп неделя дырна ачыс вердас вежöм вöвжугсö, пидзöссэз вылын назёмас кыскасьö, серебрушкаэсö кошшö, а сэтöн чегöм грош абу.

Тöдас и дяконыс эта сьöмкерись кöбыла йылiсь да вежас сiйö аслас жеребеч вылö. Поплöн сьöлöм вывсис дзик изын тарöвтчас: сёжö нильдöтiс абутöм вöвжугсö.

А дякон кузь юрсисö ассис нетшкö, но чöлö, некинлö оз висьтась, што ёрдöм кöбылажугыс не токо назём керö, но и неучöт убыток. Да недыр тöждiс этадз дяконыс: пономар сы дынö локтiс: «Но, — думайтö дякон, — öнi ась сiя куртыштас сьöмсö: некинлö öбида оз ло, быдöнным богатсяламö!» И жалейттöг сетiс «денежнöй» вöвсö пономар вöв понда.

— Тэ миян коласiсь медгов, — шуö, — дак и видз сiйö вексö, чукöрт сьöмтö да шороммезö тэч.

Но чожа мыйись пономарыт шумитны пондiс, кöть трепичöн öмсö тупкав:

— Тэ, отеч дякон, каналля? Кöстiн тэ меным оглобля туяс ньöр! Вай, буди, бöр кöбылаöс, а этö ноктоичатö босьт.

Сэтöн дякон мыччалiс поп вылö чуньнас, а поп шуö:

— Мунамö, воннэз, мужыксö кошшыны, кутам да виям! А мужык важын ни поплiсь вöвсö вузалiс да видзöтö, кыдз бы мöдiккезöс вурны-бöбöтны.

Аддзисö мужыксö кошшиссес, сюйыштiсö мешöкö да юкмöсын мöдöны пöдтыны. А ю дорöдззас нематын вöлöма. Святöй отеччез кынмöмась да шонтiсьны пырöмась. Мужыкöс додь бердас домыштасö да мороз вылас и колясö.

Гöнитö туй вылöт озыр мужык. Казялас, што кинкö додяс вöрöтчö. Кежас, пешлас мешöксö — ровно морт сэтöн.

— Тэ мыйлö мешöкас пырин? — юасьö туйись морт.

— Кöбы ачым пыри, дак ачым бы и петi, — висьтасьö мужыкыс. — А вот менö силой сэтчö сюйыштiсö.

— Мыля сiдз инö?

— Бöрйисö менö Государственнöй думаö, а ме сэтчин ог бы пукав. Дак аддзан кыдз кыскöны менö?

Озыр и думайтö: «Менам сьöм уна, меным и пукавны думаас!» — и шушкö мужыклö:

— Пет чожжыка мешöксис, да некинлö эн висьтась. А сы понда тэныт вот пятачок да менчим вöлöс босьтан.

Сюйыштiс мужык аслас местаö богатинасö, пуксис сы додьö да гöнитiс одзлань. Рытнас посадö локтiс да базарö инмис. Вузалiс донтöмика вöвсö да кабачокö пырыштiс. А сэтöн опичеръё юöны, ассиныс горёнысö винаöн пöдтöны: савдаттэс пö оз кывзö. Сибöтчис мужык дынö опичер и юалö:

— Тэнат ныв эм?

Вежöртiс мужык, мый опичерыслö колö, да отвечайтö:

— Эм.

— Дак вайöт сiйö ме дынö: бура вештiся, — шуö опичерыс и сетö ассис адрес.

Мужык бöбöтiс опичерлiсь сьöм, медбы абутöм нылыслö паськöм небны, и мунiс базарö. Аддзис сэтчинiсь женскöй паськöм, мöдöтчис инькаö и рытнас локтiс опичер дынö. Опичер туплясьö ольпасьын да корö нывкасö дынас. Мужык баитö нывка моз, вöснитик голосöн:

— Айö тшöктiс перво корны сьöм. Опичер оз спорит: на босьт.

— Öнi бы ме öтöрö петала, — корсьö мужык. — А медбы эг öш пырикас, гезок вай киам, домйылын лэдз.

Опичеррез сякöйсö аддзывлöны, дак и этö нылö не диво: мун пö петав, колö дак.

Петас горничаас мужык, чöвтас вывсис женскöй паськöмсö да пасьталас опичерыслiсь. Картасис козаöс аддзас да гезоксö сюр бердас домалас, а ачыс одзлань мунас. Коза сулалас, сулалас да пессьыны пондас. «Натьтö, нывкаыс вöрöтö гезоксö, — думайтö опичерыс. — Öшис, тыдалö». Петас картаас, сылö паныт коза: «Ме-е!»

А мужык кежыштас лавкаö. Приказчик баитö аслас роботниклö:

— Мун висьтав инькаöлö, што ме таой ог лок гортö.

Мужык видзöтiс, кытчö роботник пырас, кытöн приказчикыс олö, а сыбöрын и ачыс сэтчин мунас. Инькалö гажтöм кузь рытсö öтнаслö чулöтны и примитас опичерсö. Токо пуксисö пызан сайö, ыбöсас кинкö пондiс ёркöтчыны. Кöзяйка торскöтöмыс сьöртi тöдiс жöниксö да дзебис гöсьсö шкап сайö: лöг вöлi жöникыс! Приказчик кытшöмкö гумагаэз босьтiс да бöр мунiс.

— Но, кöзяйка, меным туй вылö сет геньгаок, — корö опичер, — сэк некинлö ог висьтав, што тэ дынö вовла.

А инькаытлöн, кыдз нарошно, öтiк грош абу. Сiдз и мунiс немтöг мужыкыс, да ашынас бöра лавкаö пырис.

— Вот мый, кöзяин: медбы некытшöм слава эз лэб, эз сералö тэнчит юртö, сет меным сто руб. Сэки ме некинлö ог висьтась, што таой тэ ордын вöлi.

Мöдытлö буржык сто рубсö сетны, нежели умöль славасö кывны. Босьтiс сьöмсö мужык и пажнайтны бöра приказчикыс инь дынö мунiс. Инька вердiс-юкталiс, пызан вылiсь пондiс дзимлявны ни, да сэтчö жöникыс оградаас пырис. Кытчö опичерсö воштыны? Осьтiс коробъя да дзебис сэтчö Вежöртiс кöзяиныс, што опичерыс бöра сы ордын, и давай кошшисьны. Омöн бергöтiс, а коробъясö эз осьтлы. Сiдз и мунiс, нем эз аддзы. А мужык пырис бöрсяняс жö лавкаö и сто руб сьöм корö.

— Дак тэ бöра миянын вöлiн? — дивуйтчö приказчик. Но споритны эз понды, чожжык сетö сьöмсö. И роботникöс тшöктö аслас керку гöгöр видзöтлыны да висьтавны, кин сы ордö пырас. А мужыклö окота приказчиксö розоритны: öддьöн ни сiя отирöс бöбöтлiс, весь сьöмсö кулис. Вот и пырис мужыкыт рытъявнас приказчик керкуö, а мöдыс сэтчö тюк токо локтiс. Аддзö кöзяйка, што умöль лоас сылö, и водтöтас опичерсö песласян öрö да ва паськöмнас вевттяс (инькаыс какраз песласьöм). Токо ештiс сайöвтны, а кöзяиныс керкуас ни.

— Кытöн сiя?! — чирзö. — Ме кыкнаннытö вия!

Инька суськисьö, Ен вылö ыстiсьö, што некинöс эз аддзыв. Жöникыс кошшис-бергöтiс керкусис омöн, но некин абу. И пондiс повзьöтлыны иньсö:

— Сота керкусö, палита, но ловйöн ог лэдз сiйö! Иньыс кеймисьö:

— Да кöть паськöмсö петкöтам да вöлись öзты. Эд баня бöрсянь нем лоас вылат пасьтавны!

Приказчик кывзiс иньыслiсь вежöра баснисö, и нiя кыкöн петкöтiсö öрсö керкусис.