Тыра курöг

Мунö туй кузя мужык, нöбöтö курöжокöс. Бöрсяняс зоныс кыссьö, кольттез пожтыр видзö. Паныт нылö — поп.

— Дыр ов, батюшко, — чöвтiс шапкасö мужык.

— Кытчö туй видзан, грешнöй? — юасьö попыс.

— Ярманка вылö, батюшко.

— Мыйла сэтчин?

— Курöгöс вузавны мöда.

А поплöн — быдыс эта йылiсь тöдö — синнэс завидушшöйöсь, киэс загребушшöйöсь. Мый казялас, сiйö и курмыштö бы да донтöмика.

— Мымда коран, грешнöй?

— Сто руб, батюшко.

— Мый тэ баитан?

— Миян курöгным не простöй, а тыра, öддьöн кольття. Луннас шоччисьö, а ойнас орöттöг кольттялö. Видзöт, мымда талун сетiс да сымда жö вузалiмö ни.

— Дона, — шуö, — дона, грешнöй. Гривенник сета. Сэтчö и пондiс готсьыны курöгыс: ко-ко-то, ко-ко-то. Мужык и шуö:

— Но, оз ков дак оз. Мöдiк босьтас. Аддзан, бöра лöсьöтчö...

Поп мöдöртiс кузь зепсö, сетiс чожжык сьöмсö: ась пö ме дын ни кольттялас.

Босьтiс коклаткасö, котöрöн мунiс гортас. Тшöктiс роботниксö короб керны и виччисьö, кöр пондас пемдыны.

Кузьой сулалiс курöгыс бокын, а сiя токо позсö покаститiс. Лöгасис да ачыс и мургыльтiс курöжокыслiсь юрсö. Сэтöн сылöн и оланыс овсис, а миян каскиным висьтассис.

Кöчкыйись да поп

Вайö мужык кыйöм кöччезöс. Паныт поп шедö: — Кыдз тэ нiйö кыян, висьтав!

— Кыйисьыс киö ачыс кöчыс пырö. Вай велöта тэнö.

— Велöт, велöт.

— А то кыдз: босьта из, пукта кöч туй вылас. Ордчöн капустаюр пукта и табак сы гöгöр реза. Локтас кöч, йирыштас капустасö, и табакыс нырас шедас. Сэсся кыдз öддзас несйыны да из бердас кымöснас вартны, сiдз и поткöтас кымöссö. А тэ токо ешты öктыны кöччесö.

Поп неделя сьöрна каттяс кадсö, быдса короб капуста сэтчö сюяс, а кöч бöж оз аддзыв. «Но, — думайтö, — велöта ме бöбöтчукаöс!»

Локтас мужык ордö, а сiя öшмöсiсь чери кыйö.

— Тэ бöбöтiн менö, мужык! — горöтлö поп. — Ёрда тэнö!

— Чöв жö, батюшко. Кин жö öнi кöччесö кыйö, кöр чериыс кульмö?

Сайкалiс поп, дугдiс видчыны.

— Ладно, велöт нö черисö кыйны.

— А мый велöтны? Лок татчö луншöрнас да и лэбты мымда колö.

Сiдз и керас попыс. Босьтас сiя ыджытжык ведра, локтас öшмöс дынö и давай васö вугырнас лöсйыны. Отир видзöтö сы вылö да сералö:

— Тшöкты ылöстöмöс юрбитны, дак кымöссö поткöтас.

Бöбсялöм поп

Öтiк поплöн вöлöма роботник. Быдсöн ачыс бур: уджалö-менöвтö кык понда, а сёйö öтiк морт понда. Но öтiк торöн вöлöма умöль — нимсö абу висьтавлöм.

Вот олö попыс ордын неделя, кыкö олö, а куимöт вылас попаддя нывнас, кыдз сир, лякасисö роботникыс бердö: висьтав да висьтав пö нимтö. И попыс тожö: ежели пö он висьтав, то мöдпöв пырта.

— Да нёжтöма менö шуöны, батюшко, — баитö попыслö роботник. — Менам нимö «Быдöннытö вартла».

А попаддялö мöдiкö висьталiс:

— Тэ, матушка, эн осудит менчим нимöс и некинлö эн висьтав. Менö шуöны «Крестнат вур».

Поповналö куимöт ним висьталiс: «Спинаö лудö».

Роботник висьталас ассис нимсö да и пышшас попыс ордiсь, а сьöрас пара вöв нуöтас. Поп, дзик шальнöй пон, котрасьöв-керас, да кут ыб вывсис тöвсö!

А роботник ылöжык пышшас эта местаись да барин дынö кучерöн медасяс: уджыс кокнит и абу буса-нятя, не кыдз попыслöн.

И кыдзкö öтпыр бариныс лöсьöтчис ветлыны молебен служитны ылiсь вичкуö. А кучер пыксьö, оз тшöкты баринсö мунны: сiя какраз сэтчинiсь мунöм. Вот кучер и баитö баринлö:

— Сэтчин попыс, шуöны, бöбсялöм. Да и попаддяыслöн не быдöс пö гортас.

А барин аслыс тебенитö: мунам да мунам. Мый сэтöн керан! Баринлöн воляыс!

— Мунiсö. Барин пырис вичкуö, а кучер домалiс вöввесö да вичку оградаöт ветлöтö. Поповна казялiс сiйö да мамыслö ыксö:

— Матушка, матушка! «Спинаö лудö» татöн! Попаддя паныт шушкö:

— Эн чирзы, бöбöв! Керпит кыдзкö, сыбöрын гыжъялан.

А мöдыс эшö горöнжык:

— Матушка, матушка! «Спинаö лудö» татöн! — и мыччалö чуньнас öшынö.

Дзар керас öтöрö попаддяыс да кыдз горöтас:

— Батюшко, батюшко! «Крестнат вур» татöн! Поплöн синнэс баралiсö: бöбмис эд инькаыт! А попаддя сё сiйö лёбö да öшынланяс кулакнас чувйö.

Сэтчö и попыс казялiс ассис важ роботниксö да кыдз рякöстас:

— «Быдöннытö вартла», «Быдöннытö вартла» кутö! — и, кыдз жеребеч, чеччöвтiс клирос вывсяняс.

Отирыс чепöссисö ыбöсланяс, öта-мöднысö тальöны-петöны вичкусис.

Сэк и бариныс вежöртiс, што попыс забыль бöбсялöм, и уськöтчис öшынас да чожжык телегаас пуксис.

Сэксянь поплöн зепыс вöснямис, етша отирыс пондiс вовлыны эта вичкуö. Зато роботниккесö попыс буржыка пондiс видзны.