Таратайкаын поп

Поплö окота лоас таратайкаын гöняйтны. Роботник доддялас вöвсö, да вожжиэсö не сермöт бердас домалас, а оглобляэс бердö. Доддялас, пуксьöтас попсö да, медбы эз усь, таратайка бердас кöрталас и сетас попыс киö вожжиэсö, висьталас:

— Пондан керöс увтö лэдзчыны, висьтав «тпру», а керöсö кайны — «ны».

Гöнитö поп — пуэс мелькайтöны. Но и таратайка!

Пондас лэдзчыны керöс увтö, поп шуас «тпру», и вöлыс тран сувтас, петас сийöссис да пышшас гортас. А таратайка сьöрас ош вотчас. А кöр волыс пышшас, ошыс сбруяас шедас да сийöсассяс и давай котöртны, давай котöртны — веськыта ыббезöт, логгезöт! Вот вöрöдз локтас, а сэтöн кöз вылын мачурка öшалö. Ош кылас ма дуксö и гыж-вач каяс кöз вылö. Таратайкаыс кышасяс уввезас да сэтчö и кольччас. Панясяс-керас ош да лэдзчас кöз вывсис и мунас аслас туй кузя. А поп кольччас öшавны пу вылас.

Елесько

Кöркö важся каддэзö, олас Елесько аслас мамкöт. Вöлас сiя басöк, но умнас кокнит. Кöр мамыс кулас, сiя кольччас öтнас. Керны нем оз куж: не пуны, не страпайтны. И лöсьöтчас Елесько гöтрасьны. Советуйтчас старукаэзкöт, нiя висьталасö:

— Гöтрась, Елесько, гöтрась. Сiя, инькаыт, йöрнöс тэныт заптас, юны-сёйны ваяс.

Корасисö озырöс. Невестаыс эз откажитчы, и сэтöн жö сiйö Елеськоыс дынö вайöтасö. Ой узясö, том инь и шуö:

— Тэ мый нö, Елесько, сё узян? Чеччы, уджавны колö.

Елесько шы оз сет. Кошшö, кошшö иньыс, мый бы сёйыштны, да нем оз аддзы.

— Елесько, ветлы мамö дынö, поди сiя мыйкö сетас сёйны.

Мунас Елесько. Тёшшаыс бура гöститöтас. А гортас инькаыс тшыг пукалö.

Ой локтас, водасö узьны. Асывнас чеччасö, иньыс бöра иньдö Елеськосö мамыс дынö:

— Мун, Елесько, мамö дынö, поди сiя иньдас гöстинеччез, кöть нiйö сёйыштам.

Мунас Елесько. Тёшша бöра сiйö юкталас-вердас, сьöрас сетас гос тор. А деревняас олас понкулись. Сiя уна поннэсö ни куляс и кöс кучиккесö туй бокöттяс сувтöтлас. Елесько мунас эта туй кузя, казялас поннэсö и думайтас, што нiя сiйö мöдöны пурны. Торйöтлас госсö учöтик тороккез вылö и сюяс кулöм поннэслö öммезаныс.

Локтас гортас, иньыс юалö, мый сетiс мамыс гостинечсö.

— Гос тай сетiс.

— А кытчö тэ сiйö воштiн?

— Поннэзöс вердi, а то бы нiя пурисö менö. Иньыс и шуö:

— Бöбöв тэ, Елесько. Тэ бы сiйö гортö вайин да горö сылöтны сюйыштiн.

— Эн видчы, инька, мöдпырся сiдз и кера.

Ой локтас, водасö узьны. Асывнас чеччасö, иньыс сiйö бöра мамыс дынö иньдöтö:

— Мун, Елесько, мамö, поди сетас гöстинеч. Мунас Елесько. Тёшшаыс бöра юкталас-вердас сiйö, а иньыс сё гортас тшыгйöн пукалö.

Тёшша сетас ыджыт тулуп.

Локтас Елесько гортас, тулупсö ольсалас джодж шöрас, вундалас неыджыт торрез вылö и сюйыштас горö. Иньыс юалö:

— Мый вайин?

— Мый вайи? Тулуп тай вайи. Ме сiйö вундалi торрез вылö и сюйыштi горас, мед сылiс.

— Елесько тэ, Елесько. Сiйö эд колiс чуланö пыртны да тувйö öшöтны.

Видö, видö сiйö иньыс: ме бы новйи пö сiйö, а тэ чисто вундалiн.

— Дугды, инька, мöдпырся сiдз и кера.

Локтас ой, водасö узьны. Асывнас чеччасö, иньыс бöра иньдö мамыс дынö. Мунас Елесько и бöра тёшшаыс ордын сёяс-юас, а иньыс сё тшыгйöн пукалö. Сетас сылö тёшшаыс пöрись мöсöс. Вайöтас сiйö Елесько гортас, пыртас чуланö и давай тув вылö öшöтны. Мöсыс баксö, оз сетчы, а сiя силком кыскö. Мöсыс кулас. Рытнас иньыс юалö:

— Мый сетiс мамö?

— Мöс тай сетiс да ме сiйö чуланас пыртi да тувйö öшöтi.

— Елесько тэ, Елесько, бöбöв Елесько! Тэ бы сiйö картаö йöртiн да турун сетiн, да ваöн юкталiн.

— Но, мöдпырся сiдз и кера.

Ой чулалас, а асывнас иньыс бöра иньдö жöниксö мамыс дынö:

— Ме эд быдса неделя ни тшыгйöн ола.

Мунас Елесько. Тёшшаыс сiйö юкталас-вердас да ыстас сыкöт мöд нывсö. Ась пö печкö тiянын, гажажык сойыслö лоас.

Елесько вайöтас иньыслiсь сойсö гортас, йöртас картаö, сетас турун сёйны да ва юны. Пырас гортас, иньыс юалö:

— Но мый талун мамö ыстiс?

— Сойтö тай тэнчит ыстiс. Ме картаö сiйö йöртi, турун сылö сетi, а сiя токо горзö.

— Елесько тэ, Елесько! Тэ бы сiйö керкуас пыртiн да юкталiн-вердiн.

— Но, ме мöдпырся сiдз и кера.

Бöра ой чулалас, а асывнас иньыс Елеськоöс иньдö мамыс дынö. Тёшша бöра пöттöдз вердас зятьсö да сьöрас порсьöс сетас: начкылö пö да сёйö. Иньыс гортас эз вöв, кöр бертiс Елесько. Сiя пыртас порсьсö керкуас, юкталас-вердас. Локтас иньыс, юалö:

— Но, мый мамö иньдöтiс?

― Порсёкöс сетiс. Ме сiйö керкуас пыртлi, пызан сайö пуксьöтлi, да сiя эз понды сёйны. Иньыс видiс, видiс, да мый бöбыскöт керан. Кöть мымда велöт, раз абу умыс, дак эд ассит он содты.