Ош да мужык

Олас-вöлас мужык. Оланыс сылöн вöлöма умöль. Вот öтпыр мужык и шуö аслыс:

— Йöзыс ректiсьöны и нянь сёйöны. Кая и ме ошпозъяинö ректiсьны. Он тöд, и ме няньöн лоа.

Кутас мужык ассис Пеганкосö да каяс ошпозъяинö. Локтас ошпозъяинö, гöгöрпöв бергöтчас, Пеганкосö мыр бердö домалас да пондас ректiсьны. Петö сэтчö ош:

— Тэ эстöн, менам гортын, мый керан, кыдз тэ менам позö лысьтiн локны? Эд ме Пеганкотö тэнчит сёя.

Мужык сылö паныт и шуö:

— Чöв жö, Оша-Миша, эн лöгась! Кыдзкö мыйкö керамö да öтлаын посоглассю пондамö овны. Ме вот ректiсьны тэ ордö локтi, кушиннэтö ошпозъяинсит мöда бы гöрны да нянь кöдзны. Окотаыт кö эм, и тэ öтлаын мекöт вай уджав, мöдпыр няньöн лоам.

Ош думайтас-керас: и быль эд мужыккöт посоглассю лоö керны — сiя морт, берсяыс сылöн кисис петö, сы сайсянь и меным буржык лоас гуам кузь тöвсö чулöтны.

Баитчасö и уджалöны кыкöн, ректiсьöны. Ош — мыр шедтö, мужык — шаття-баддя летö да öсек керö. Ректасö вельтума. Колö гöрны — гöрныс абу, мый керны?

Морт и шуö ошлö:

— Вай, Оша-Миша, вужъя пу, доддясь сы бердö да кыскав, а ме понда гöрны.

Ош вужъя пу шедтас, доддясяс и ружтö-кыскалö, а морт ветлöтö бöрсяняс да вужъя пусö веськöтлö.

Гöрасö сiдз лун, гöрасö кыкö, медбöрын ош мыдзас.

— Но, тырмас, — шуö мужыклö ош, — этö кöдзам кö, миянлö сэсся нем оз и ков.

Шоччисьыштасö-керасö, кватитчасö — пиняыс бöра абу, пинявны немöн. Пондасö керны пиня. Мужык кöстö улык, ош вартö пиня туввез. Пиня аркмас. Колö пинявны. Доддясяс пиня бердö Оша-Миша, а морт пуксяс пиня вылö да веськöтлö.

Сэсся локтас кад и кöдзны. Пондасö сёрнитчыны, кинлö мый мöдпыр босьтны, а оз шуö мый кöдзны.

— Меным увтсö, — шуö ош, — тэныт вевдöрсö.

— Бур и сiдз, — оз ло паныт морт.

Вот кöдзасö шогдi. Нянь аркмас бурся-бур. Мужык вундас шогдiсö, кольтаэз тэчас додяс и лэдзчöтас гортас. А Оша-Миша вундöмподсö летас, аслас берлогаö пыртлас и тöвйö.

Тулыс локтас, мужык бöра Пеганкоыс вылö пуксяс да кайö ошпозъяинö.

А Оша-Мишаöс, вундöмподсö тöвбыт сёйтöн, витш кыскöм. Сiя паныт мужыклö петö и горöтö:

— Тэ, зонка, менö бöбöтöмыт. Аддзан, тöвбытöн вундöмпод вылат овтöн менам öтiк ордлыэзö гер колисö. Öнi ме Пеганкотö сё ни джагöта.

— Чöв жö, Оша-Миша, дугды лöгавны, миян посоглассю вöлi керöма. Эд тэ ачыт аслыт пайтö бöрйин.

— Но, ладно, — шуö ош, — сэсся менö он ни бöбöт: öнi меным вевдöрсö, тэныт увдöрсö.

— Бур и сiдз, — шуö мужык.

Кöдзасö сёртни. Сёртни аркмас бурся-бур, веж да гöгрöса, кыдз виль тöлiсь.

Арнас мужык керас сёртнисö, мешöккезö куралас, ошлö корсö коляс. Ош бöра мырсьö, аслас гуö пыртлö сёртни корсö.

Локтас тöв, морт пуö сёртнисö, пöжалö, парёнкаöн сёйö да сьылöмöн олö.

А ош сёяс-сёяс корсö — не пöт, не тшыг, токо вира мыт прокод видзö.

Мöдiк тулыс сибалас, морт бöра Пеганко вылас ошпозъяинö и локтö. А ош паныт сылö:

— Тэ менö, зонка, мöдпырся ни бöбöтiн. Ме сёртни корсö тöвбыт сёйтöн аддзан мыйö пöри. Вира мыт менчим быд векöс кыскис. Сёроно ни Пеганкотö öнi джагöта.

— Чöв жö, Оша-Миша, — морт шуö, — эд ми керим тэ кöт посоглассю, тэ ачыт босьтiн аслыт вевдöрсö, меным сетiн увдöрсö, винитны некинöс. Лок жö перво ветлам ме ордö гöститны, а сэтчин ачыт тöдан — сёян сёй вöлöс Пеганкоöс.

— А кыдз ме тэкöт муна, — шуö ош, — тiян поннэз лöгöсь, менö нетшкасö, да и додьсит уся, пукавны ог вермы.

— А ме тэнö додь бердö гезöн кöртала да вевдöрат öнöн каття, мед поннэс эз казялö.

Ош водас додяс. Мужык сiйö öнöн каттяс, додь бердö гезöн жын-жын кöрталас, ачыс вöв вылö вожасис и локтö.

Горт деревняас лоас да пондас горöтны, ошöс пö кутi да ловйöн гортöдз вайöтi.

Суседдэз öксясö — кин черöн, кин вилаöн, öн павтыртасö — додьын быль куйлö ловъя ош.

Оша-Миша аддзö, дело умöль аркмö, нетшкöвтчас бы местасис да оз вермы трек керны — додь бердас жын-жын кöрталöм.

Сэтчö сiйö мужыккез и виясö. Кучик кулясö да вузаласö, а яй öта-мöд коласын юкаласö да быдса неделя сёясö.

Ме сэтöн жö вöлi, ошлiсь бöж вильöтi. Бöж помсö пиннезнам ыжмитi да кыдз бы нюжöтi, сiя брунь орис — ме гатш-гатш токо лякаси.