Асабістыя дакументы

 

Заява – гэта дакумент, які ўтрымлівае просьбу якой-небудзь асобы. Адрасуюць заяву арганізацыі ці службовай асобе ўстановы.

 

Размяшчэнне частак заявы:

1) найменне пішацца зверху з водступам на трэць радка;

2) прозвішча, імя, імя па бацьку заяўніка – пад адрасатам;

3) тэкст пішацца з чырвонага радка;

4) дата ставіцца злева, подпіс –  справа.

Афармленне наймення адрасата: калі яно ўяўляе сабой назву арганізацыі, то ставіцца ў В. скл., калі гэта назва пасады службовай асобы – у Д. скл.

Клішыраваныя формы:

1. Просьба выражаецца:

прашу + інф. (дазволіць, дапусціць і г.д.)

Прашу Вашага дазволу (згоды) + на што?

2. Канструкцыі ўводу аргументацыі:

у сувязі з тым, што...; на падставе таго, што...; таму што... .

прыклад

ЗАЯВА

Дэкану камерцыйнага факультэта Беларускага гандлёва-эканамічнага ўніверсітэта спажывецкай кааперацыі дац. Локцевай К. І. аспіранткі кафедры гісторыі Беларусі Тамашовай Вольгі Іванаўны

Прашу камандзіраваць мяне ў Мінск у бібліятэку Акадэміі навук тэрмінам на 10 дзён дзеля азнаямлення з архіўнымі матэрыяламі па тэме дысертацыі.

 

 Дата                                                                                        (подпіс)

 

ЗАЯВА

У аддзел фотакопій Беларускай дзяржаўнай бібліятэкі акад. Жураўлёва В. П., які пражывае па адрасу: г. Мінск, вул. П. Броўкі, д. 6, кв. 13

 Прашу зрабіць мне фотакопію кнігі Выгоцкага Л.С. “Пытанні тэорыі і гісторыі псіхалогіі”, т. 2. – М., 1982, неабходную для навуковай работы.

   Дата                                                                                      (подпіс)

Даверанасць – дакумент, з дапамогай якога адна асоба прадас-таўляе другой асобе паўнамоцтвы зрабіць за яе якое-небудзь дзеянне (часцей за ўсё – атрымаць што-небудзь).

Размяшчэнне частак даверанасці:

1) тэкст пішацца з чырвонага радка;

2) дата ставіцца злева, подпіс – справа;

3) пад датай i подпiсам неабходна прадугледзець месца, каб засведчыць дакумент.

 Клішыраваныя формы

Хто? + давяраю + каму? + інф. (атрымаць...).

Прыклады

Даверанасць

Я, студэнт другога курса эканамічнага факультэта БГЭУ, Белікаў Іван Іванавіч, давяраю студэнту першага курса Кісялёву Сяргею Аляксандравічу атрымаць мае падручнікі ў бібліятэцы ўніверсітэта.

Дата                                                                                           (подпіс)

Подпіс студэнта Белікава А. І. сведчу

Дата                                                                                            (подпіс)

ДАВЕРАНАСЦЬ

20.01.1999

 

Я, Гуськова Ганна Мікалаеўна, давяраю атрымаць маю заработную плату за жнівень месяц у памеры 200 000 (дзвесце тысяч) руб. галоўнаму інжынеру МАЗа Капко Мікалаю Пятровічу.

 

Лабарант                                  (подпіс)                       Г.М. Гуськова

 

Подпіс Гуськовай Г. М. сведчу

Інспектар АК                                (подпіс)                   Р.Т. Калініна

 

Распіска – дакумент, які сцвярджае, што ва ўстанове ці ад прыватнай асобы атрыманы рэчы, дакументы, грошы.

Размяшчэнне частак распіскі:

1) слова распіска пішуць з вялікай літары пасярэдзіне радка;

2) тэкст распіскі пішуць з чырвонага радка;

3) дата – злева, подпіс – справа.

 

Клішыраваныя формы:

Я, + прозвішча, імя, імя па бацьку + пасада + атрымаў...

Прыклад

Распіска

Я, Барысюк Павел Сямёнавіч, студэнт 3 курса эканамічнага факультэта БГЭУ, 18 чэрвеня 2002 г. атрымаў ад загадчыцы склада ўніверсітэта Навіцкай Тамары Сяргееўны 1 (адну) брызентавую палатку і 5 (пяць) рукзакоў.

Пасля 28 чэрвеня ўсё атрыманае вярну на склад.

18 чэрвеня 2002 г.                                                               (подпіс)

 

Аўтабіяграфія – кароткі расказ пра свой жыццёвы шлях, які пішацца ад першай асобы.

У пачатку тэксту трэба назваць сваё прозвішча, імя, імя па бацьку, час і месца нараджэння, сказаць пра заняткі бацькоў. Пасля гэтага коратка гавораць пра гады вучобы, называюць асноўнае з працоўнай і грамадскай дзейнасці. У канцы тэксту ставяць дату і подпіс.

Прыклад

Аўтабіяграфія

Я, Герасімовіч Тамара Пятроўна, нарадзілася 15 сакавіка 1985 г. ў г. Масты Гродзенскай вобласці. Мой бацька, Пётр Міхайлавіч, працуе інжынерам на мэблевай фабрыцы, маці, Ганна Антонаўна, – настаўніца беларускай мовы і літаратуры.

У 1991 г. я паступіла ў сярэднюю школу № 2 г. Масты, якую закончыла ў 2001 г. У тым жа годзе паступіла ў БГЭУ на эканамічны факультэт, дзе і вучуся па сённяшні дзень.

Дата                                                                                        (подпіс)