Күтілетін нәтижелер:

- өзінің, жақын адамдарының есімдерін, киімнің, жиһаздың, ыдыстардың, кейбір қозғалыс құралдарын атай біледі;

- бөлмедегі және одан тыс заттардың(бақшада, аулада, көшеде) атауларын біледі;

- кейбір жануарлар мен олардың қимылдарын біледі;

- заттардың белгілерін, жай-күйлерін, орналасқан орындарын атайды;

- жасы мен жынысына сәйкес айналасындағы адамдарды, уақыттық және сандық қатынастардың атауларын атайды;

- жай сөздерді қолданады және оларды түсіндіреді;

- өзінің (қол, аяқ, бас, ауыз, көз, құлақ) және ойыншық- жануарлардың дене мүшелерін ажыратады және атайды;

- дыбыстық еліктеуіш сөздерді жалпы қолданылатын сөздермен ауыстырады (аб- аб-ит);

- құрылымы мен мазмұны бойынша қарапайым тіркестерді тәрбиешінің ойыншықтарды, өзінің қимылдарын көрсетуін түсінеді;

- жай сөйлеммен айтылған өтініштерді орындайды ;

- 1–3 әрекеттен тұратын, қуыршақ пен ойыншықтармен күрделі емес шағын сахналауды түсінеді;

• кейбір есімдіктерді (мен, біз, сен, маған), үстеулерді (онда, сонда); сын есімдерді (үлкен, кіші, жақсы, жаман, дәмді) және қосымшаларды (-да, -де,- та, -те) қолданады;

- таныс заттар туралы сұрақтарға сөзбен немесе қысқа сөз тіркесімен жауап береді;

- сөзбен немесе қысқа сөз тіркесімен өз өтінішін білдіреді, тапсырманы мұқият тыңдайды және оны басқа адамға жеткізе алады;

- дауысты дыбыстарды және түсінікті артикуляциялық қатынастағы дауыссыз дыбыстарды анық айтады;

- шағын, қарапайым әңгімелерді, тақпақтарды, өлеңдерді, сәйкес суреттерді қолдана отырып тыңдайды, түсінеді;

- көркем мәтінді тыңдайды және оны эмоциямен қабылдайды;

- шығарма кейіпкерлеріне жанашырлық танытады.

«Таным» білім беру саласы

«Таным» білім беру саласының базалық мазмұны:

- сенсорика;

- жаратылыстану ұйымдастырылған оқу қызметінде іске асырылады.

«Таным» білім беру саласын ұйымдастыруда баланың қоршаған ортаны бағдарлау аясы кеңейтіледі және байытылады, сезімдік тәжірибесі қалыптасады, түйсіктері және қабылдауы жетілдіріледі.

Мақсаты: табиғат құбылыстары, адамдардың өмірі туралы түсініктерін,танымдық қабілеттерін қалыптастыруға арналған жағдайлармен қамтамасыз ету.

Міндеттері:

- қоршаған орта туралы білімін кеңейту және байыту;

- сенсорлық қабілеттерін қалыптастыру;

- өлі және тірі табиғат құбылыстары жайлы бастапқы түсініктерін қалыптастыру;

- жануарлар әлеміне қамқор қарым-қатынас жасауға тәрбиелеу;

- бейнелі-қимылдық ойлауды, есті, қиялды, зейінді, қабылдауды дамыту.

Сенсорика

Бұл жастағы балалардың сенсорлық саласы қалыптасады, зейін, қабылдау, ойлау, затты қолдану әрекеттері, түсті, пішінді және көлемді бағдарлауы дамиды.

1 Жастан 1 жас 6 айға дейін

Балаларда заттарды сырғымалы лентаның көмегімен, ауа шарын, ойыншық машинаны, арбаны жібінен тарту, жібінен тарта отырып, дыбысын шығара білу қабілеттері қалыптасады.

Орындауға үйрету:

- бір-бірімен байланысты тура және кері әрекеттерді орындау: жаю және жинастыру, алу және салу, шарлардың түрлі түсті тығындарды қорапқа, шелекке ауыстырып салуды, оларды еңіс жазықпен сырғанатуды;

- заттарды өлшемі немесе пішіні бойынша сәйкес ұяларға орналастыра отырып, салыстыруға арналған тапсырмаларды орындауды;

- екі бөліктен тұратын ойыншықтарды, түрлі өлшемдегі 2–3 сақинадан тұратын конустық негіздегі (өзекшесі) пирамидаға, кейіннен тік өзектегі пирамидаға бір өлшемді бірнеше сақинаны, содан кейін түрлі өлшемді екі топтағы сақиналарды белгілі бірізділікпен жинастыруды;

- қызыл, сары, жасыл, көк, ақ және қара түске боялған: біртекті заттарды тану және жұмыс жасауды;

- түрлі материалдардан жасалған заттардың шығаратын дыбыстарын, сонымен бірге музыкалық тембрлердің дыбыстарын ажыратуды үйренеді.