Әдебиеттік оқу

Мерзімі:

ІХ тарау. Жаздыгүн шілде болғанда

Тақырыбы: Бөлімді қайталау

Мақсаты:

1. Білімділік: «Жаздыгүн шілде болғанда» тарауын қайталай отырып білімімен, біліктілігін бақылау, сөздік қорын жетілдіру;

2. Дамытушылық: Жан-жақты ойлауға үйрену қабілетін дамыту;

3. Тәрбиелік: Әдептілікке, инабаттылыққа және табиғатты қорғау, бақылау, зерттей білуге тәрбиелеу.

Түрі: қайталау.

Әдісі: сұрақ-жауап, түсіндіру, іздену, өзіндік

Көрнекілігі: арнайы суреттер, тест материалы.

Сабақтың барысы:

І. Ұйымдастыру кезеңі. Амандасу,түгендеу,оқушылардың зейінін, назарын психологиялық жаттығулар орындау арқылы сабаққа аудару. Күнге қолдарыңды созыңдар. Күннің жомарт сәулелері ананың нәзік алақанындай аялайды, сипалайды, жылытады.Сиқырлы күн барлық өкпе мен мұңды ерітіп жібереді. Жүрегімізді жылу мен махаббатқа толтырады.

Барлығы: Күн жарығын алақанға саламын,

Жүрегіме басып ұстай қаламын.

Ізгі әрі нәзік, жарық, мейірімді,

Болып кетер сонда дереу жан-жағым.

-Міне, жүрегіміздегі осындай жылумен сабағымызды бастаймыз.

ІІ. Мақсат қою кезеңі: Сабақтың мақсатын хабарлау, оқушы зейінін сабаққа аудару.

Біз қандай тарауды аяқтадық?

«Жаздыгүн шілде болғанда» тарауынан неге үйрендік, не білдік?

Қандай ақын, жазушылардың еңбегімен таныстық?

ІІІ. Өткенді қайталау:

1.«Сипаттау» деген ұғыммен таныстыру. Сипаттап айтуға үйрен.

Заттың белгілерін белгілі бір мақсатқа қарай ашып көрсетуді сипаттау дейді. Жазушы кейде табиғат құбылыстарын, мезгілді, өзіне әсер еткен басқа да көріністерді сипаттап жазуы мүмкін. Осы бөлімде мұндай сипаттауға мысал бола алатындай шығармалар көптеп берілді.

2.Өздігінен тапсырмаларды орындау:

1. Жаздың әдемі көрінісін сипаттауға арналған шығармаларды ата.

2.Абайдың «Жаз» өлеңіндегі жаз көрінісін өз сөзіңмен әңгімеле.

3.Мезгілді сипаттауға арналған шығармаларды ата. (Жаз. Шілде. Шыбынсыз жаз. ...)

4.Осы сипаттауға сүйеніп сурет салып көр.

Сергіту сәті. Орнымыздан тұрайық,

Алақанды ұрайық.

Бір отырып, бір тұрып,

Біз шынығып алайық

ІҮ. Білімін тексеру: С. Мұқановтың «Шыбынсыз жаз» әңгімесіндегі жаз келбетін суреттеген жолдарын тауып оқы. «Жаз» тақырыбына әңгіме құр.

Ү. Сабақты қорыту: Бүгінгі сабақта біз не істедік?

Сонымен, «Жаздыгүн шілде болғанда» тарауынан не білдік, неге үйрендік?

Тест:

1. Заттың, құбылыстың басты белгілерін нақты бір мақсатқа қарай ашып көрсететін мәтін түрі-

А) Пайымдау Б) Әңгімелеу

Ә) Салыстыру В) Сипаттау

2. Белгілі бір құбылыс, оқиға оиға жөнінде хабарлайтын мәтін түрі-

А) Пайымдау Б) Әңгімелеу

Ә) Дәлелдеу В) Сипаттау

3. Ә. Нұрпеейісовтың әңгімесіндегі «Күн қызара төмен жылжып барады. Асықпай қараған адамға күн аспаннан түсіп келе жатқан қызыл доп сияқты...» деген жолдарды мәтіннің қай түрінде жатқызуға болады?

А) Пайымдау Б) Әңгімелеу

Ә) Дәлелдеу В) Сипаттау

4.Өлең жолдарын аяқта: Жоғары-төмен үйрек, қаз...»

А) Шалғыннан жоны қылтылдап Б) Жаздыгүн шілде болғанда

Ә) Ұшып тұрса сымпылдап В) Айнала шауып бұлтылдап

5. М.Дулатов « Бұл –қымыз молайып, қозы піскен кез» деп қай ай туралы айтып отыр? А) Шілде Ә) Маусым Б) Тамыз В) мамыр

6. С.Мұқановтың «Ешбір көркем кілемнің ,ешбір көркем кестенің бетінен табылмайтын ғажап бояуларды көресіз!» деген сөздері қай жыл мезгіліне қатысты айтылған?

7. М. Иманжанов « Тек қана электр шамындай жарқырап Шолпан жұлдызы тұр» деп тәуліктің қай мезгілі туралы айтып отыр? А) Кешкі Ә) Таңғы Б) Түскі В) Түнгі

8. М.Әуезов пен Ә. Нұрпейісовтің шығармаларының ұқсастығы- А) Екеуінде де жазғы таң суреттеледі Ә) Екеуінде де жаулау суреттеледі Б) Екеуінде де жазғы кеш суреттеледі В) Екеуінде де түн суреттеледі

9. Қ.Ыдырысов:  Қораға тығылды, Қозы-лақ маңырап. Үлкендер жүгірді. Бұзаулар жамырап,- дейді бұл қай кезде болады? А) Қар жауғанда Ә) Жаңбыр жауғанда Б) Жел тұрғанда В) Кешкі мезгілде

10. Ө.Тұрманжановтың осы бөлімдегі өлеңін есіңе түсір. «Құп, атажан, жүгіріп Күркесіне кіріп, Қозыларға барайын. Қарайын да санайын» деген кімнің сөзі. А) Автордың Ә) Қойшының Б) Малсақ баланың В) Атаның

ҮІ.Үйге тапсырма: «Жаз» тақырыбына сурет салу

Бекітемін:________________